Басманны раённы суд Масквы завочна арыштаваў пісьменьніка Барыса Акуніна (сапраўднае імя Грыгорый Чхартышвілі). Пра гэта паведаміла прэс-служба маскоўскіх судоў агульнай юрысдыкцыі.
Барыс Акунін — вядомы расейскі пісьменьнік. Ён быў сярод дзясяткаў расейскіх дзеячоў культуры, якія асудзілі поўнамаштабнае ўварваньне Расеі ва Ўкраіну. 24 лютага ў сваім фэйсбуку ён заявіў, што пачалася новая страшная эпоха.
Пазьней кнігі Акуніна сталі прыбіраць з паліц у шэрагу расейскіх кнігарняў. А самога пісьменьніка абвінавацілі ў распаўсюдзе лжывай інфармацыі аб войску і ў публічным апраўданьні тэрарызму.
За крытыку Пуціна і яго агрэсіўнай палітыкі імя Акуніна было таксама выдалена з афішаў спэктакляў, пастаўленых на яго п'есы. Некаторыя тэатры нават зьнялі з рэпэртуару спэктаклі.
Барыс Акунін з 2014 году жыве ў Лёндане.
Ілжывай інфармацыяй пра расейскае войска ў РФ называюць практычна любыя выказваньні, якія супярэчаць афіцыйнай пазыцыі Крамля адносна вайны супраць Украіны.
Летась на Акуніна завялі крымінальную справу і ўнесьлі яго ў сьпіс гэтак званых іншаземных агентаў.