З 1 верасьня школьнікі дзясятых клясаў пачнуць вывучаць гісторыю па новым падручніку — «Гісторыя Беларусі ў кантэксьце сусьветнай гісторыі».
Макет навучальнага дапаможніка ўжо гатовы, расказаў дзяржаўнаму выданьню «СБ. Беларусь сегодня» міністар адукацыі Беларусі Андрэй Іванец.
«З 1 верасьня ў 10‑й клясе ўводзім новы інтэграваны курс „Гісторыя Беларусі ў кантэксьце сусьветнай гісторыі“. Макет навучальнага дапаможніка гатовы, праходзіць экспэрымэнтальную апрабацыю ў 14 установах адукацыі краіны», — сказаў Андрэй Іванец.
Паводле міністра, цяпер паралельна распрацоўваецца дапаможнік для 11-й клясы. Таксама на даручэньне Аляксандра Лукашэнкі «праведзены поўны аналіз падручнікаў гуманітарнага профілю».
Андрэй Іванец сьцьвярджае, што факты ў падручніках «мяняць ня будуць».
«Адыходзім ад манатоннага завучваньня датаў і месцаў падзеяў, робім упор на фармаваньне сьветапогляднай карціны школьніка. Што да іншых прадметаў, у кожнай кнізе будзе заключаны выхаваўчы патэнцыял — тэксты, заданьні будуць накіраваныя на фармаваньне любові да роднай краіны. Перапісваньня ня будзе, размова аб удасканаленьні», — заявіў міністар.
- На пачатку 2023 году дзяржаўны тэлеканал АНТ СМІ паведамляў, што новы падручнік «Гісторыя Беларусі ў кантэксьце сусьветнай гісторыі» павінен зьявіцца ва ўсіх школах восеньню 2025 году.
- 5 сьнежня падчас паседжаньня Рэспубліканскай рады па гістарычнай палітыцы пры адміністрацыі Лукашэнкі стала вядома, што абавязковым для вывучэньня школьнікамі ў наступным навучальным годзе плянуюць зрабіць прадмет «Гісторыя беларускай дзяржаўнасьці».
- У 2023 годзе выдалі падручнікі «Генацыд беларускага народа ў гады Вялікай Айчыннай вайны»: зьявіліся адпаведныя дапаможнікі асобна для 1-4-х, 5-9-х і 10-11-х класаў.
- У Расеі і Беларусі апошнім часам актыўна перапісваюць падручнікі гісторыі. З падручнікаў прыбіраюць згадкі пра масавыя рэпрэсіі, злачынствы эпохі сталінізму, нэгатыўна ацэньваюць вызвольнае паўстаньне 1863 году.
