Сяргея Бічукова прызналі вінаватым у халатнасьці, якая пацягнула гібель двух чалавек. У верасьні суд Добрускага раёну пакараў яго 2 гадамі ў калёніі-пасяленьні, піша «Флагшток».
Старшыню сельскага выканаўчага камітэту асудзілі за трагічнае здарэньне ў вёсцы Антонаўка, якое адбылося ў сьнежні летась. У закінуты шахтавы калодзеж з вадой, накрыты лістамі шыфэру, упалі двое мужчын. Яны атрымалі цяжкія траўмы, ад якіх памерлі. Бічукову, у юрысдыкцыі якога знаходзіўся калодзеж, выставілі абвінавачаньне ў службовай нядбайнасьці.
Пасьля суд прызнаў Бычкова вінаватым у неналежным выкананьні службовай асобай сваіх абавязкаў. У дадатак да 2 гадоў калёніі-пасяленьня суд абавязаў яго выплаціць на карысьць жонкі аднаго з загінулых матэрыяльную кампэнсацыю ў 20 тысяч рублёў.
Старшыня сельвыканкаму віны не прызнаў і падаў скаргу на прысуд. Ягоную заяву разглядае Сяргей Салоўскі, вядомы палітычна матываванымі прысудамі, у тым ліку ўдзельнікам рагачоўскага гурту Tor Band.
57-гадовы Сяргей Бічукоў — колішні школьны настаўнік, а затым — шматгадовы старшыня Насавіцкага сельвыканкаму. Ужо ў 2013 годзе ён ужо займаў гэтую пасаду. Акрамя таго, ён зьяўляецца дзейным дэпутатам Добрускага райсавету 28 скліканьня.
Насовіцкі сельвыканкам застаецца адзіным у Добрускім раёне, што ня мае кіраўніка.
