Пажар стаў самым трагічным здарэньнем у постсавецкай гісторыі краіны, піша казаская служба Радыё Свабода.
Па стане на 19.30 мясцовага часу колькасьць загінулых вырасла да 45, паведамілі ўлады 29 кастрычніка, дадаўшы, што працягваецца пошукава-выратавальная апэрацыя. Невядомым застаецца лёс яшчэ аднаго чалавека, які лічыцца зьніклым бязь вестак.
«Пошукавая апэрацыя абцяжарана разбураным кар’ерным абсталяваньнем, а таксама месцамі завалаў», — гаворыцца ў паведамленьні МНС.
Ратавальнікі шукаюць шахтароў на двух участках шахты на адлегласьці 4 кілямэтраў адзін ад аднаго.
Прыблізна 252 чалавекі знаходзіліся пад зямлёй на шахце імя Кастэнкі, калі раніцай 28 кастрычніка адбыўся пажар, паведаміла апэрацыйная кампанія ArcelorMittal, другі па велічыні вытворца сталі ў сьвеце.
Улады заявілі, што пасьля ўзьнікненьня пажару паступіў загад аб эвакуацыі, але выбух адбыўся раней, чым многія рабочыя змаглі пакінуць месца. Выбух адчуваўся больш чым за 2 кілямэтры, паведаміў супрацоўнік ратавальнай службы Генадзій Сілінскі.
Урад Казахстану 28 кастрычніка пацьвердзіў нацыяналізацыю мясцовай філіі мэталюргічнага гіганту ArcelorMittal Temirtau, які кіруе найбуйнейшымі мэталюргічнымі заводамі краіны і некалькімі вугальнымі і руднымі шахтамі.
Прэм’ер-міністар Казахстану Аліхан Смаілаў заявіў у заяве, што ўрад дасягнуў папярэдняй дамоўленасьці з акцыянэрамі кампаніі і зараз знаходзіцца ў працэсе «афармленьня» нацыяналізацыі.
Кампанія ArcelorMittal пацьвердзіла, што падпісала «папярэдняе пагадненьне аб зьдзелцы, якая прадугледжвае перадачу права ўласнасьці Рэспубліцы Казахстан».
