Праект прадугледжвае збор і аналіз экспэртных заключэньняў, распрацовак, прапановаў па зьмене сыстэмы і публічнае абмеркаваньне высноваў.
Каб лепш даведацца, як функцыянуе турэмная мэдыцына і псыхалёгія ў Беларусі, экспэрты распрацавалі анкеты для былых вязьняў і сваякоў асуджаных. Іх просяць прайсьці ананімнае апытаньне, якое дапаможа грамадзкасьці даведацца, што адбываецца ў месцах несвабоды, а экспэртам — выпрацаваць дзейсныя рэкамэндацыі, як зьмяніць пэнітэнцыярную сыстэму Беларусі ў будучыні.
Раней такія апытаньні ў Беларусі не праводзілі.
У працоўную групу праекту ўвайшлі былы супрацоўнiк Генпракуратуры Алег Талерчыĸ, юрыст і праваабаронца Павал Сапелка, былы начальнік мэдыцынскай часткі СІЗА ў Берасьці Павал Перапёлкін, былы начальнік мэдслужбы Дэпартамэнту выкананьня пастаноў МУС Васіль Завадзкі, псыхоляг Вольга Вялічка. Таксама ў экспэртнай групе прадстаўленыя вядомыя беларускія юрысты і праваабаронцы, псыхолягі і лекары, сярод якіх Алег Граблеўскі, Людміла Казак, Леанід Судаленка і іншыя.
- Беларусь знаходзіцца на першым месцы ў Эўропе і адзінаццатым у сьвеце па колькасьці зьняволеных.
- У Беларусі функцыянуе больш за 60 месцаў пазбаўленьня волі, у якіх утрымліваюць больш за 35 тысяч чалавек. Каля 1,5 тысячы асуджаных праваабаронцы прызналі палітвязьнямі, аднак рэальная лічба можа быць у некалькі разоў большай — улады наўмысна хаваюць інфармацыю аб палітычных працэсах.
- У месцах зьняволеньня асуджаныя зазнаюць псыхалягічны і фізычны гвалт, яны пазбаўленыя права на годную мэдыцынскую дапамогу. Пры гэтым нагляд за захаваньнем правоў вязьняў застаецца фармальным, доступ у месцы несвабоды маюць толькі сілавікі і прадстаўнікі праўладных арганізацый, іх дзейнасьць непразрыстая.
