Расейская адміністрацыя часткова акупаванай Запароскай вобласьці Ўкраіны заявіла аб стварэньні дзьвюх супольных вытворчасьцяў зь беларускімі прадпрыемствамі.
Як паведаміла расейскае дзяржаўнае агенцтва ТАСС, акупацыйныя ўлады ўжо пачалі адпаведныя перамовы з Менскім трактарным заводам і Аршанскім мясакансэрвавым заводам.
Ва Ўкраіне гэтай інфармацыі не камэнтуюць.
Да пачатку расейскага ваеннага ўварваньня, якое падтрымаў Аляксандар Лукашэнка і вайсковае кіраўніцтва Беларусі, ва Ўкраіне ў розныя гады працавалі некалькі зборачных прадпрыемстваў беларускіх трактароў. Гэтую тэхніку ў пачатку 2000-х зьбіралі на прадпрыемстве «Ленінская кузьня», якое да 2018 году належала ўкраінскаму бізнэсоўцу Пятру Парашэнку.
У розны час Беларусь і Ўкраіна абмяркоўвалі магчымасьць стварэньня супольных прадпрыемстваў па выпуску беларускіх трактароў на базе дзяржаўнага прадпрыемства «Южмаш» і Харкаўскім трактарным заводзе.
У 2008 годзе зборку трактароў МТЗ адкрылі ў Мікалаеўскай вобласьці. Для гэтага Менскі трактарны завод супольна з прадпрыемствам «Гомсельмаш» заснавалі Гандлёвы дом «МТЗ-Беларус-Україна». Цяпер прадпрыемства знаходзіцца ў стане спыненьня дзейнасьці — 21 сакавіка 2023 году заснавальнікі прадпрыемства ўхвалілі рашэньне аб закрыцьці прадпрыемства.
У траўні 2023 году прэзыдэнт Украіны Ўладзімір Зяленскі ўвёў санкцыі супраць 18 беларускіх прадпрыемстваў, у тым ліку супраць ААТ «Гомсельмаш», якое было адным з заснавальнікаў мікалаеўскага зборачнага прадпрыемства.
