Пра гэта 22 верасьня паведаміў Цэнтар нацыянальнага супраціву (падразьдзел пры камандаваньні сілаў спэцыяльых апэрацыяў Міністэрства абароны Ўкраіны).
«„Каштоўным кадрам“ зь ліку вагнэраўцаў, якія перайшлі інструктарамі ў лукашэнкаўскі „ГардСэрвіс“, паабяцалі выдаваць кватэры без чаргі. У той час як беларускія вайскоўцы ў найлепшым выпадку атрымліваюць жыльлё бліжэй да пэнсіі», — гаворыцца ў паведамленьні.
Адзначаецца, што такім чынам рэжым Аляксандра Лукашэнкі набірае з расейскіх наймітаў сілы, неабходныя «для здушэньня пратэстаў», і «выразна расстаўляе прыярытэты ў абароназдольнасьці сваёй краіны». «Аднак такія рашэньні ўзмацняюць сацыяльнае напружаньне сярод беларускіх сілавікоў», — сьцьвярджае ЦНС.
18 верасьня з спасылкай на «мясцовае падпольле» Цэнтар нацыянальнага супраціву паведаміў, што ў Беларусі «засталося менш за тысячу тэрарыстаў з ПВК «Вагнэр».
Паводле інфармацыі ЦНС, інструктарамі спэцпадразьдзелаў беларускіх МУС і Міністэрства абароны сталі каля 200 вагнэраўцаў, астатніх «ня хочуць забіраць ні ў новыя ПВК, ні ў Міністэрства абароны Расеі».
16 верасьня цэнтар заявіў аб стварэньні ў РФ новай ПВК, «каб перавабіць зь Беларусі тэрарыстаў з «Вагнэра». Сьцьвярджалася, што ёю будзе апекавацца расейскае вайсковае ведамства.
Раней ЦНС заяўляў, што вагнэраўцам, якія знаходзяцца ў Беларусі, нібыта прапануюць паступіць на працу ў беларускае прыватнае ахоўнае прадпрыемства «ГардСэрвіс».
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
