— «Вагнэр» і Прыгожын — гэта заўсёды было не адно і тое ж. Прыгожын быў самавартаснай фігурай палітыкі, а «Вагнэр» сам па сабе — інструмэнтальны і другасны. І калі ўхілілі Прыгожына, то ўхілілі менавіта як Прыгожына, а не як кіраўніка «Вагнэра». Калі шукаць аналёгіі, то гэта вельмі падобна да гісторыі з штурмавікамі Рома, зь якім Гітлер жорстка расквітаўся. Тут падабенства нават да дэталяў, у Рома таксама быў эпізод місіі за межамі бацькаўшчыны — праўда, ня ў Афрыцы, а ў Лацінскай Амэрыцы, у Балівіі.
Рэжымы падобныя, і лёс іх пэрсанажаў падобны. Зыходзячы з гэтага падабенства, я мяркую, што «Вагнэр» будзе вычышчаны, максымальна дэпалітызаваны. Зь яго будуць прыбраныя ўсе ідэалягічныя, кадравыя, сымбалічныя прыкметы сувязі з Прыгожыным. І «СА» цяперашняга крамлёўскага рэжыму ператворыцца ў вельмі службовую структуру. Яе можна будзе аддаць у падпарадкаваньне нават МНС. А можна і Ўзброеным сілаі РФ. З усімі натуральнымі наступствамі для базаваньня ў Беларусі, калі яна там наагул застанецца.
— Паводле афіцыйнай вэрсіі, «Вагнэр» у Беларусі — гэта была частка ўгоды, каб прадухіліць рэйд на Маскву. Як казаў Прыгожын — іншая юрысдыкцыя. Калі гэта так, то цяпер угода рассыпалася, няма яе контрагента. Ці гэта і тады была іншая ўгода?
— Угода можа памяняцца. Паўтаруся, «Вагнэр» і Прыгожын — гэта не адно і тое ж. «Вагнэр» без Прыгожына нават у Беларусі ня будзе перашкаджаць нікому — ні ў Расеі, ні ў Беларусі. Калі знойдуць яму нейкую службовую функцыю ў Беларусі, пакінуць там. Магчымыя нейкія правакацыйныя рэйды ў раён беларуска-польскай ці беларуска-літоўскай мяжы.
Але ўсё гэта будзе ўжо пад поўным кантролем і ня так маштабна, як меркавалася пры Прыгожыну. Падкрэсьлю, пры Прыгожыну, а ня зь ім. І кампанія можа застацца ў Беларусі, на радасьць Лукашэнку, якому яна будзе аддадзеная ў поўнае падпарадкаваньне.
— А грошы хто плаціць будзе на іх утрыманьне?
— Ну, браты грошы ня лічаць. Мяркую, што бюджэт таго, што застанецца ад «Вагнэра», будзе не такі істотны, каб Масква і Менск наконт гэтага не дамовіліся.
— Зьявілася цікавае паведамленьне ТАСС — што з нагоды катастрофы самалёта Прыгожына ў Цьвярской вобласьці СК РФ распачаў крымінальную справу аб «парушэньні правілаў палётаў». Не забойства, а менавіта вось гэтага. Выглядае неяк як жахлівы тролінг (праўда, незразумела каго).
— Ну а што — з фармальнага пункту гледжаньня ўсё правільна, парушэньне ж мела месца. Парушэньне правілаў палётаў усе бачылі. І ніхто ж не паспрачаецца.
Спроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.
