Саміт праходзіць у Ёганэсбургу. Прэзыдэнт Расеі Ўладзімір Пуцін удзельнічае ў саміце празь відэасувязь, бо ўзьніклі цяжкасьці зь яго паездкай у ПАР пасьля таго, як Міжнародны крымінальны суд выдаў ордэр на ягоны арышт у сувязі з вайной ва Ўкраіне і выкраданьнем расейцамі ўкраінскіх дзяцей на акупаваных тэрыторыях.
Прэзыдэнт ПАР Сырыл Рамафоса прымае старшыню КНР Сі Цзіньпіна, прэзыдэнта Бразыліі Луіза Інасію Лулу да Сілва і прэм’ер-міністра Індыі Нарэндру Модзі, якія прыбылі на саміт асабіста.
Расею прадстаўляе міністар замежных спраў Сяргей Лаўроў.
Па словах прадстаўнікоў ПАР, афіцыйныя заяўкі на ўступленьне ў БРІКС падалі больш за 20 краін, уключаючы Саудаўскую Арабію.
Дэлегацыю Беларусі на саміце ўзначьвае міністар замежных спраў Сяргей Алейнік.
Міністар замежных спраў Беларусі Сяргей Алейнік на палях саміту БРІКС у Паўднёвай Афрыцы сустрэўся з кіраўніком МЗС Экватарыяльнай Гвінэі Сімяонам Аона Эсана Ангуэ.
«На парадку дня — актывізацыя кантактаў на розных узроўнях, у тым ліку абмен візытамі, пашырэньне дамоўна-прававой базы, сытуацыя ў афрыканскім рэгіёне», — паведамілі ў МЗС Беларусі.
БРІКС (BRICS) — міждзяржаўнае аб’яднаньне пяці краін: Бразыліі, Расеі, Індыі, Кітаю і ПАР. Абрэвіятура ўтворана з пачатковых літар у назвах гэтых дзяржаў. Арганізацыю стварылі ў чэрвені 2006 году, на гэты момант адбылося 14 яе самітаў. Заяўкі на ўступленьне ў БРІКС падавалі сярод іншых Аргентына, Банглядэш, Грэцыя, Іран, Нігерыя, Саудаўская Арабія, Сырыя, Эгіпет.
