Згодна з дадзенымі экзыт-полу IPSOS, на прэзыдэнцкіх выбарах у Польшчы кандыдат ад кіроўнай Грамадзянскай кааліцыі Рафал Тшаскоўскі мае мінімальную перавагу — 50,3% галасоў, паведаміла wyborcza.pl. Яго супернік Караль Наўроцкі, падтрыманы правымі партыямі, атрымаў 49,7% галасоў і заявіў пра свой спадзеў на перамогу.
Вынікі экзыт-полу апублікаваныя а 21:00 польскага часу (22:00 менскага часу, калі зачыніліся выбарчыя ўчасткі).
Згодна з гэтымі дадзенымі, першае месца на прэзыдэнцкіх выбарах можа заняць кандыдат ад партыі «Грамадзянская плятформа», якая ўваходзіць ва ўрадавую кааліцыю, Рафал Тшаскоўскі — цяперашні мэр Варшавы. Экзыт-пол прагназуе, што ён атрымае 50,3% галасоў.
Ягоны апанэнт, дырэктар Інстытуту нацыянальнай памяці Караль Наўроцкі, паводле апытаньняў атрымлівае 49,7% галасоў.
Рафал Тшаскоўскі ў штабе ужо заявіў пра перамогу і сказаў, што будзе «прэзыдэнтам усіх полек і палякаў».
Караль Наўроцкі таксама выказаў упэўненасьць у сваёй перамозе і сказаў, што гэтай ноччу пасьля падліку галасоў ён стане прэзыдэнтам, ён выйграе гэтыя выбары, бо розьніца мініммальная.
Аднак лідэрства Тшаскоўскага няпэўнае. Статыстычная хібнасьць дасьледаваньня складае +/– 2 працэнтныя пункты. Неабходна дачакацца вынікаў позьняга галасаваньня (late poll) каля 23-й гадзіны польскага часу, а пасьля — афіцыйных дадзеных Дзяржаўнай выбарчай камісіі (PKW). Там абяцалі канчатковыя вынікі пасьля паўдня 2 чэрвеня.
Яўка выбарнікаў, паводле Gazety Wyborczej, вышэйшая, чым два тыдні таму, яна склала 72,8 працэнта. Права галасаваць маюць амаль 29 мільёнаў палякаў.
Форум