Уладзімер Гундар гаворыць пра пагрозы ў калёніі
Палітзьняволены з інваліднасьцю Ўладзімер Гундар 3 жніўня ўпершыню пазваніў з бабруйскай калёніі сваякам, паведаміла BPN крыніца, якая пажадала застацца неназванай. Паводле суразмоўцы, 63-гадовы Гундар ня скардзіўся на ўмовы ўтрыманьня, яму хапае ежы, зараз ён шмат бывае на дварэ, піша і чытае там.
«Аднак ён расказаў сваякам, што двое крымінальных зьняволеных да яго чэпяцца, пагражаюць ажно да пабіцьця. Гэта Яўген Е. і Віталь Р.», — адзначыў знаёмы з сытуацыяй. Прычыны пагрозаў пакуль невядомыя.
Суразмоўца паведаміў, што Гундар заўважна схуднеў. Як вядома, ён перасоўваецца на мыліцах, у яго няма нагі.
Крыніца таксама адзначыла, што асуджаныя маюць інфармацыю з волі, ведаюць пра сьмерць мастака Алеся Пушкіна, пра некаторыя падзеі ва Ўкраіне і памежнае здарэньне з удзелам беларускіх верталётаў.
У траўні 2021 году Берасьцейскі абласны суд прысудзиў актывісту з Баранавічаў 3 гады пазбаўленьня волі ва ўмовах агульнага рэжыму паводле артыкулу аб «гвалце ў дачыненьні службовай асобы» (арт. 366 КК).
Пазьней палітвязень стаў фігурантам «справы Аўтуховіча», у рамках якой яму спачатку інкрымінавалі «тэрарызм». 17 кастрычніка 2022 году Горадзенскі абласны суд асудзіў яго на 18 гадоў пазбаўленьня волі ва ўмовах узмоцненага рэжыму, але паводле іншых крымінальных артыкулаў — за «стварэньне злачыннай арганізацыі» (ч. 1 арт. 285) і «замах на змову з мэтай захопу дзяржаўнай улады неканстытуцыйным шляхам» (ч. 1 арт. 14 і ч. 2 арт. 357).
У красавіку 2023 году Гундара асудзілі трэці раз — на 2,5 года за «абразу» пракурора (арт. 369). З улікам мінулых выракаў канчатковым пакараньнем стала зьняволеньне на 20 гадоў.
