Лачынскі калідор, адзіная дарога, якая злучае Армэнію з Нагорным Карабахам, ужо больш за сем месяцаў блякуецца Баку. 25 ліпеня ўрад Армэніі заявіў, што паспрабуе адправіць у Нагорны Карабах 360 тон мукі, алею, цукру і іншых асноўных прадуктаў харчаваньня, каб зьліквідаваць там востры дэфіцыт харчу, выкліканы блякадай.
Афіцыйныя асобы Армэніі выказалі надзею, што расейскія міратворцы будуць суправаджаць пастаўкі дапамогі. 19 армянскіх грузавікоў дабраліся да ўезду ў Лачынскі калідор 26 ліпеня, але заставаліся там на працягу наступных гадзін, і Баку адмовіўся прапусьціць іх праз азэрбайджанскі кантрольна-прапускны пункт, усталяваны там у красавіку.
У сваёй заяве МЗС Азэрбайджану асудзіў канвой з дапамогай як «правакацыю» і назваў гэта замахам на тэрытарыяльную цэласнасьць Азэрбайджану. Старшы памочнік прэзыдэнта Азэрбайджана Ільхама Аліева заявіў, што Ерэван павінен адмовіцца ад «тэрытарыяльных прэтэнзій» да яго краіны.
Прэм’ер-міністар Армэніі Нікол Пашыньян абараніў спробы дастаўкі гуманітарнай дапамогі.
«Мы ня можам закрываць вочы на сытуацыю, зь якой цяпер сутыкаюцца армяне Нагорнага Карабаху, — напісаў Пашыньян у Twitter. — 360 тон жыцьцёва важных прадуктаў харчаваньня адпраўлены ў Нагорны Карабах выключна ў гуманітарных мэтах».
Раней у гэтым месяцы Азэрбайджан прыпыніў рух праз кантрольна-прапускны пункт у калідоры ў чаканьні расьсьледаваньня пасьля таго, як ён заявіў, што ў аўтамабілях Чырвонага Крыжа, якія ішлі з Армэніі, выявілі «розныя віды кантрабанды». Прыпыненьне руху ўзмацніла занепакоенасьць гуманітарным крызісам у Нагорным Карабаху.
Як Армэнія, так і сэпаратысцкія ўлады ў анкляве заявілі, што Азэрбайджан блякаваў тэрыторыю са сьнежня, што прывяло да недахопу харчаваньня, лекаў і энэргіі.
Армэнія і Азэрбайджан вялі дзьве вайны за Нагорны Карабах, горны анкляў, населены пераважна армянамі, які міжнародна прызнаны часткай Азэрбайджану. Апошняя вайна доўжылася шэсьць тыдняў у канцы 2020 году і прывяла да гібелі 7000 салдат з абодвух бакоў. У выніку вайны Азэрбайджан вярнуў кантроль над часткай Нагорнага Карабаху і сямю прылеглымі раёнамі. Вайна скончылася спыненьнем агню пры пасярэдніцтве Расеі, згодна зь якім Масква разгарнула каля 2000 вайскоўцаў для выкананьня міратворчых абавязкаў.
