«Узброены прадстаўнік літоўскага памежнага ведамства зайшоў на беларускую тэрыторыю на некалькі мэтраў і вярнуўся назад. Інцыдэнт зафіксаваны камэрамі назіраньня. Аб факце незаконнага перасячэньня беларускай мяжы ў вызначаным парадку праінфармаваны сумежны бок», — гаворыцца ў паведамленьні ведамства.
Паводле інфармацыі ДПК, 25 красавіка ў гэтым жа пункце пропуску «двое іншаземцаў пры правядзеньні тэхнічных работ таксама парушылі мяжу зь Літвы ў Беларусь».
Літоўскі бок пакуль не камэнтаваў сытуацыі, не пацьвярджаў і не зьняпраўджваў словы ДПК Беларусі.
Беларускія памежнікі ўжо ня ўпершыню абвінавачваюць памежнікаў суседніх Літвы, Польшчы, Латвіі і Ўкраіны ў правакацыях і парушэньнях мяжы. Украіна і краіны ЭЗ неаднаразова фіксавалі на фота і відэа дапамогу беларускіх памежнікаў нелегальнай міграцыі.
Актыўны этап мігранцкага крызісу завяршыўся, але штодня невялікія групкі мігрантаў спрабуюць незаконна перасячы межы і трапіць зь Беларусі ў Эўразьвяз. Улады ў Вільні, Варшаве і Рызе вінавацяць у арганізацыі правакацый рэжым Лукашэнкі.
