Колькасьць сіл павышанай гатоўнасьці NATO будзе даведзеная да 300 тысяч вайскоўцаў, пра гэта 7 ліпеня на прэсавай канфэрэнцыі перад самітам альянсу заявіў яго генэральны сакратар Енс Столтэнбэрг.
«На саміце мы зробім далейшыя важныя крокі па ўмацаваньні нашага стрымліваньня і абароны. З трыма новымі плянамі рэгіянальнай абароны, каб супрацьстаяць дзьвюм асноўным пагрозам для нашага Паўночнаатлянтычнага саюзу: Расеі і тэрарызму.
Адзін плян для поўначы, Атлянтыкі і Эўрапейскай Арктыкі. Адзін для цэнтру, які ахоплівае Балтыйскі рэгіён і Цэнтральную Эўропу. І паўднёвы плян для Міжземнага і Чорнага мора. Для выкананьня гэтых плянаў NATO прывядзе ў павышаную гатоўнасьць 300 тысяч вайскоўцаў. Уключаючы значную баявую моц у паветры і на моры», — заявіў ён.
Столтэнбэрг агучыў рашэньні адносна Ўкраіны
Генэральны сакратар NATO заявіў, што на саміце альянсу ў Вільні 11–12 ліпеня будзе створаная Рада NATO — Украіна. Столтэнбэрг разьлічвае, што прэзыдэнт Украіны Ўладзімір Зяленскі возьме ўдзел у яе першым пасяджэньні.
Плянуецца таксама, што на саміце лідэры прымуць пакет адносна Ўкраіны, які будзе ўтрымліваць тры асноўныя элемэнты:
- Паводле Столтэнбэрга, лідэры ўзгодняць шматгадовую праграму падтрымкі для забесьпячэньня поўнай сумяшчальнасьці паміж узброенымі сіламі Ўкраіны і NATO. Столтэнбэрг дадаў, што альянс дапаможа Ўкраіне ў пераходзе ад савецкага абсталяваньня да стандартаў NATO.
- Па-другое, адзначыў генэральны сакратар, на саміце будуць адноўленыя палітычныя сувязі паміж Украінай і NATO шляхам запуску Рады Ўкраіна — NATO.
- «І трэцяе. Я чакаю, што лідэры пацьвердзяць, што Ўкраіна стане сябрам NATO, і будуць адзіныя ў тым, як наблізіць Украіну да яе мэты», — дадаў Столтэнбэрг.
Раней прэзыдэнт Уладзімір Зяленскі заклікаў прэзыдэнта ЗША Джо Байдэна запрасіць Украіну ў NATO ўжо цяпер — нават калі краіна ўступіць у Альянс пасьля вайны.
Прэзыдэнт Літвы Гітанас Наўседа заявіў, што на саміце NATO ў Вільні ўдасца дамовіцца аб такіх абавязаньнях перад Украінай, якія яе не расчаруюць.
