Міністэрства юстыцыі ЗША паведаміла пра падазрэньне ў дачыненьні грамадзяніна Беларусі. Сьледзтва думае, што 46-гадовы Сяргей Карпушкін абыходзіў санкцыі ў інтарэсах украінскага алігарха Сяргея Курчанкі, які жыве ў Маскве і працуе ў інтарэсах Расеі.
Карпушкін і ягоны 41-гадовы кампаньён Джон Унсалах з Арланда куплялі матэрыялы для вытворчасьці сталі. Агульная сума абыходу санкцый складае 150 млн даляраў.
Сьледзтва абвінавачвае Карпушкіна паводле аднаго артыкулу — у змове з мэтай парушэньня і ўхіленьня ад санкцый ЗША ў парушэньне Закону аб міжнародных надзвычайных эканамічных паўнамоцтвах (IEEPA).
Калі суд дакажа ягоную віну, беларуса могуць адправіць у турму на 20 гадоў.
Алігарх Сяргей Курчанка быў адным з найзаможнейшых людзей ва Ўкраіне пры ўладзе Віктара Януковіча. Пабудаваў бізнэс на гандлі вуглевадародамі. Таксама Курчанка валодаў футбольным клюбам «Мэталіст» з гораду Харкаў. Пасьля падзей Эўрамайдану 2014 году пераехаў у Беларусь, а цяпер жыве ў Расеі, у Маскве.
Кампаніі Курчанкі апынуліся пад санкцыямі Злучаных Штатаў за фінансаваньне так званых «ДНР» і «ЛНР». Дзьве падсанкцыйныя кампаніі зарэгістраваныя ў Расеі, адна ў непрызнанай Паўднёвай Асэтыі.
