Дзяржаўны дэпартамэнт ЗША 12 красавіка захаваў папярэднія рэкамэндацыі па паездках у Беларусь для грамадзян сваёй краіны. Беларусь, як і раней, лічыцца для амэрыканцаў небясьпечнай і яе рэкамэндуюць не наведваць.
Прычыны: адвольнае прымяненьне законаў, рызыка затрыманьня, перасьлед пратэстоўцаў у краіне, расейскі напад на Ўкраіну, нарошчваньне расейскіх узброеных сіл у Беларусі.
Грамадзянам ЗША, якія пакуль знаходзяцца ў Беларусі, раяць тэрмінова пакінуць краіну.
Таксама ім рэкамэндуюць заўсёды мець на ўвазе, якім чынам яны могуць выехаць зь Беларусі, празь якія пункты пропуску і на якой мяжы.
Да ўвагі амэрыканцаў, якія знаходзяцца ў Беларусі, інфармацыя, што дзяржаўныя органы Беларусі могуць не прызнаваць пашпарт ЗША ў выпадку двайнога грамадзянства і на гэтай падставе адмаўляць у консульскай дапамозе з боку амэрыканскіх прадстаўнікоў.
Амбасада Злучаных Штатаў у Менску фактычна не працуе з 28 лютага 2022 году. Тады супрацоўнікі амбасады выехалі з краіны, перад гэтым спусьціўшы сьцяг каля будынку. Праца амбасады афіцыйна прыпынілася да паступленьня новых дырэктыў з Вашынгтону.
