Расейская ФСБ заявіла аб спыненьні «супрацьпраўнай дзейнасьці» карэспандэнта Wall Street Journal, амэрыканскага грамадзяніна Эвана Гершковіча.
«Па заданьні ЗША ён займаўся зборам зьвестак аб адным з прадпрыемстваў расейскага ВПК, якія складаюць дзяржаўную тайну», — цытуе інфармацыйнае агенцтва «РИА Новости» прэс-рэліз ФСБ.
Гершковіча затрымалі ў Екацярынбурзе, заведзена справа аб шпіянажы, паведамляе спэцслужба.
Афіцыйная прадстаўніца Міністэрства замежных спраў Расеі Марыя Захарава заявіла, што «тое, чым займаўся ў Екацярынбурзе супрацоўнік амэрыканскага выданьня The Wall Street Journal, ня мае дачыненьня да журналістыкі».
«На жаль, гэта ня першы выпадак, калі іншаземцы выкарыстоўваюць статус «замежнага карэспандэнта», журналісцкую візу і акрэдытацыю для прыкрыцьця дзейнасьці, якая не зьяўляецца журналістыкай. Ужо ня першага вядомага заходніка «хапаюць за руку», — заявіла Марыя Захарава.
Рэакцыя газэты
Рэдакцыя The Wall Street Journal заявіла, што «глыбока занепакоена бясьпекай» свайго рэпартэра.
У рэдакцыі выданьня катэгарычна адхілілі абвінавачаньні, якія выставіла ФСБ амэрыканскаму журналісту, і заявілі, што патрабуюць тэрміновага вызваленьня Эвана Гершковіча.
