«Расейцы маюць выразна сплянаваную палітыку ў дачыненьні да ўкраінскіх дзяцей. Іх дзеяньні не хаатычныя... У іх ёсьць як мінімум пяць сцэнароў выкраданьня ўкраінскіх дзяцей», — сказала яна.
У прыватнасьці, дзеці перамяшчаюцца на тэрыторыю РФ пасьля «забойства бацькоў, пасьля адлучэньня ад бацькоў падчас так званай фільтрацыі, вывазу з інтэрнатных устаноў». Таксама, па словах дарадцы прэзыдэнта, былі выпадкі, калі дзяцей забіралі зь сем’яў на захопленых тэрыторыях пад выглядам «аздараўленьня ў дзіцячых лягерах».
«Расейцы робяць абсалютна ўсё, каб дзіця не ўзьядналася зь сямʼёй. У дзяцей адразу адбіраюць тэлефоны і не даюць паведаміць месцазнаходжаньне. Знайсьці дзіця вельмі цяжка. Расейцы раскідваюць украінскіх дзяцей па сваёй тэрыторыі і пастаянна іх перамяшчаюць. Як толькі мы нешта даведаемся пра месцазнаходжаньне дзяцей, як іх вывозяць у іншую частку Расеі. Таму на сёньняшні дзень мы вярнулі толькі 307 дзяцей з 16 тысяч», — сказала яна.
Упаўнаважаная прэзыдэнта па правах дзіцяці падкрэсьліла, што «неабходна хутка і эфэктыўна рэагаваць на злачынства генацыду супраць Украіны праз украінскіх дзяцей».
«Наша задача цяпер — неадкладна спыніць прымусовы вываз і дэпартацыю дзяцей. Для гэтага патрэбна міжнародная дапамога», — дадаў Герасімчук.
- Кіраўніца Міністэрства сацыяльнай палітыкі Ўкраіны Аксана Жалновіч 28 лютага паведаміла Радыё Свабода, што ўрад разглядае магчымасьць прымусовай эвакуацыі мірнага насельніцтва з раёнаў актыўных баявых дзеяньняў. Паводле яе слоў, працягваецца дыскусія «аж да таго, каб проста прымусова забраць семʼі з дзецьмі».
- У прыватнасьці, кіраўнік Данецкай абласной ваеннай адміністрацыі Павел Кірыленка неаднаразова заклікаў мірных жыхароў эвакуіравацца з парычыны пастаянных расейскіх абстрэлаў.
