Апрача іх, прыехалі яшчэ 15 камісараў Эўракамісіі. Украіна імкнецца, каб сёлета пачаліся перамовы аб яе ўступленьні ў Эўразьвяз.
«Сёньня адбудзецца супольнае пасяджэньне з урадам Украіны, а таксама двухбаковыя сустрэчы са сваімі візаві ва ўкраінскім урадзе», — паведаміў Ігар Жоўква, намесьнік кіраўніка Офісу прэзыдэнта Ўкраіны, у эфіры ўсеўкраінскага тэлемаратону @UAРазом.
Паводле яго, кіраўніцтва Эўракамісіі правядзе сустрэчы з прэзыдэнтам Уладзімірам Зяленскім і прэм’ер-міністрам Дзянісам Шмыгалем, а трэцяга лютага адбудзецца саміт Украіна — ЭЗ.
«Гэта вельмі важна ў кантэксьце пачатку перамоў аб уступленьні (у Эўразьвяз), якія мы вельмі хочам пачаць сёлета, а каб іх пачаць, трэба атрымаць ацэнку нашага прагрэсу, ацэнку сямі рэкамэндацый, а такую ацэнку будзе фармаваць менавіта Эўрапейская камісія, тыя эўракамісары, якія сёньня прыбываюць у сталіцу», — патлумачыў ён.
Ігар Жоўква паведаміў, што саміт мусіў адбыцца ў Брусэлі, але кіраўніцтва Эўракамісіі вырашыла зьмяніць чарговасьць і правесьці яго ў Кіеве.
«На саміце будзе абмяркоўвацца ня толькі эканоміка, а таксама і нашыя палітычныя пытаньні і міжнародная супраца, будзе некалькі блёкаў: спачатку выкананьне сямі рэкамэндацый, а далей будзе і пра формулу міру (якім чынам Эўразьвяз будзе браць удзел у формуле міру); будзе, безумоўна, пра барацьбу з расейскай агрэсіяй і, у прыватнасьці, на міжнародным узроўні, а таксама пра санкцыі», — удакладніў намесьнік кіраўніка Офісу прэзыдэнта Ўкраіны.
Паводле яго, Украіна мае намер дабіцца ад міжнароднай супольнасьці ўвядзеньня да гадавіны пачатку вайны санкцый супраць Расеі ў сфэры ядзернай прамысловасьці, а таксама ВПК.
Ігар Жоўква дадаў, што па выніках саміту Украіна — ЭЗ будзе ўхваленая супольная заява, у якой будуць зьмяшчацца ўсе пытаньні — аб пачатку перамоў аб уступленьні, сэктаральнай супрацы і міжнароднай супрацы з Украінай.
«Візыт калегіі (Эўракамісіі) зьяўляецца моцным сымбалем падтрымкі Камісіяй Украіны перад абліччам несправакаванай і неапраўданай агрэсіі Расеі. Сустрэча Эўракамісіі і ўкраінскага ўраду стане магчымасьцю абмяняцца думкамі ў многіх сфэрах супрацоўніцтва паміж ЭЗ і Ўкраінай, а таксама абмеркаваць будучае аднаўленьне, а таксама эўрапейскі шлях краіны. Гэта таксама магчымасьць для далейшага паглыбленьня супрацы з Украінай», — паведаміла прэс-служба Эўразьвязу.
Раней кіраўнік ураду Ўкраіны Дзяніс Шмыгаль заяўляў, што на саміце 3 лютага плянуецца распрацаваць дарожную мапу эўраінтэграцыі краіны.
«Тое, што гэты саміт пройдзе ў Кіеве, — магутны сыгнал як партнэрам, так і ворагам. Перш за ўсё, мы чакаем ад саміту прамежкавай станоўчай ацэнкі нашых эўраінтэграцыйных намаганьняў. Мы хочам сфармаваць падрабязную дарожную мапу, як максымальна хутка і пасьпяхова прайсьці шлях эўраінтэграцыі — ад ацэнкі той працы, якую мы правялі пасьля атрыманьня статусу кандыдата, да пачатку прадметных перамоваў аб уступе Ўкраіны ў ЭЗ», — сказаў ён.
Праз чатыры дні пасьля пачатку вайны, у канцы лютага 2022 году, найвышэйшае кіраўніцтва Ўкраіны — прэзыдэнт Уладзімір Зяленскі, сьпікер парлямэнту Руслан Стэфанчук і прэм’ер Дзяніс Шмыгаль — падпісалі заяўку Ўкраіны на ўступленьне ў Эўразьвяз. У чэрвені лідэры краін ЭЗ яе разгледзелі і ўхвалілі рашэньне аб наданьні Ўкраіне статусу кандыдата на ўступленьне ў Эўразьвяз.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
