Як піша гомельскае выданьне «Флагшток», імя затрыманага прадпрымальніка Юры Ташкінаў. У сацыяльных сетках ён выказваўся супраць вайны ва Ўкраіне і публікаваў справаздачы аб гуманітарнай дапамозе жыхарам украінскага памежжа, якія трапілі пад расейскую акупацыю ў пачатку вясны 2022 году.
Як зразумела з запісу, мужчыну затрымалі ў ягонай кватэры. Арышт праводзіў ГУБАЗіК пры падтрымцы атраду АМАП у поўнай амуніцыі. Сілавікі ўварваліся ў кватэру, павалілі гаспадара на падлогу, сьцягнулі рукі за сьпінай кайданкамі.
На відэа, зьнятым пад ціскам, прадпрымальнік кажа, што нібыта рабіў ахвяраваньні ў фонд BySol. У трактоўцы сілавікоў, грошы «ішлі на рахункі прыватных тэрарыстычных арганізацый, якія ўдзельнічаюць у баявых дзеяньнях на тэрыторыі Ўкраіны».
Паводле каналу, супраць мужчыны пачалі крымінальную справу аб фінансаваньні экстрэмісцкай дзейнасьці, ён знаходзіцца ў ІЧУ.
