У выведцы Міністэрства абароны Вялікай Брытаніі сьцьвярджаюць, што расейская рэгулярная армія і падразьдзелы прыватнай вайсковай кампаніі «Вагнэр» за апошнія чатыры дні тактычна прасунуліся ў Салядары Данецкай вобласьці і, імаверна, кантралююць большую частку гэтага гораду.
«Салядар знаходзіцца за 10 кілямэтраў на поўнач ад Бахмуту, захоп якога, падобна, застаецца галоўнай найбліжэйшай апэратыўнай мэтай Расеі. Для Расеі салядарская вось — гэта, хутчэй за ўсё, спроба атачыць Бахмут з поўначы і разбурыць украінскія камунікацыі», — мяркуюць у брытанскай выведцы.
Паводле брытанскіх выведнікаў, частка баявых дзеяньняў засяроджана на ўваходах у 200-кілямэтровыя тунэлі саляных шахтаў, якія праходзяць пад Бахмуцкім раёнам.
«Абодва бакі, пэўна, занепакоеныя тым, што гэтыя тунэлі могуць быць выкарыстаны для пранікненьня ў тыл», — мяркуюць у вайсковай выведцы Вялікай Брытаніі.
«Нягледзячы на ўзмацненьне ціску на Бахмут, Расея наўрад ці аточыць горад найбліжэйшым часам, таму што ўкраінскія войскі захоўваюць стабільную глыбіню абароны і кантроль над шляхамі забесьпячэньня», — перакананыя ў выведцы.
У Генштабе Ўкраіны не ўдакладняюць карціну баёў пад Бахмутам і Салядарам
У традыцыйнай ранішняй зводцы Генэральнага штабу Ўзброеных сіл Украіны няшмат дэталяў аб баявых дзеяньнях у найбольш гарачым пункце ўкраінскага Данбасу.
Сьпікер Генштабу Андрэй Кавалёў паведаміў, што расейскія войскі канцэнтруюць свае намаганьні на ранейшай мэце — захапіць Данецкую вобласьць у адміністрацыйных межах. Такую мэту расейцы заяўлялі ад пачатку поўнамаштабнай вайны з 24 лютага 2022 году, але ўжо 321 дзень украінцы не дазваляюць яе дасягнуць.
Паводле Андрэя Кавалёва, за апошні дзень падразьдзелы сіл абароны адбілі расейскія атакі каля трох населеных пунктаў Луганскай вобласьці, і каля дзесяці паселішчаў Данецкай вобласьці, у тым ліку пад Бахмутам і Салядарам.
Адначасова з наступам расейцы ўзмацнілі артылерыйскія абстрэлы па ўсіх населеных пунктах бахмуцка-салядарскай восі. У Генштабе паведамілі, што ад абстрэлаў на бахмуцкім кірунку пацярпелі 25 вёсак і гарадоў.
Абодва бакі — і Расея, і Ўкраіны — інтэнсіўна перакідваюць войскі на гэты кірунак. Ніводзін зь іх не зьбіраецца адступаць, нягледзячы на вялікія страты.
У Кіеве сьцьвярджаюць, што расейцы пад Салядарам адступілі
Намесьніца міністра абароны Ўкраіны Ганна Маляр заявіла, што расейцы пасьля «няўдалай спробы» захапіць Салядар адступілі і перагрупаваліся, а пасьля гэтага пачалі новы магутны штурм гораду пры дапамозе дадатковых атрадаў.
«Вораг задзейнічаў вялікую колькасьць штурмавых груп, сфармаваных з найлепшых рэзэрваў вагнэраўцаў. Вораг наступае літаральна па целах сваіх жа салдатаў, інтэнсіўна выкарыстоўваючы артылерыю, сыстэмы залпавага агню і мінамёты, накрываючы агнём уласных байцоў», — заявіла Ганна Маляр.
Намесьніца міністра абароны падкрэсьліла, што цяпер пад Салядарам адбываюцца найбольш жорсткія баі.
У расейскіх зводках пазьбягаюць згадваць пра баі пад Бахмутам і Салядарам
Міністэрства абароны Расеі на штодзённых брыфінгах паведамляе толькі аб тым, што на данецкім кірунку расейскія войскі працягваюць наступ і абстрэлы па ўсім участку баявога сутыкненьня. Паводле расейскага Мінабароны, украінская армія нясе вялікія страты ў жывой сіле і тэхнікі.
У амэрыканскім Інстытуце вывучэньня вайны сьцьвярджаюць, што пад Салядарам найбольш ваююць падразьдзелы прыватнай кампаніі «Вагнэр», а ўсе паведамленьні аб посьпехах на тым кірунку яе кіраўнік і фінансіст Яўгеній Прыгожын выкарыстоўвае для ўмацаваньня рэпутацыі сваёй арміі як найбольш эфэктыўнай баявой сілы на тэрыторыі Ўкраіны.
Некалькі дзён таму ў адміністрацыі ЗША заявілі, што павелічэньне колькасьці вагнэраўцаў, якія ваююць пад Бахмутам і Салядарам, зьвязана з зацікаўленасьцю Яўгенія Прыгожына атрымаць кантроль над здабычай солі і гіпсу з шахтаў у навакольлі Бахмуту.
Але сам Прыгожын патлумачыў, што разглядае вялікую сыстэму шахтаў і тунэляў як надзейную і бясьпечную магчымасьць для разьмяшчэньня ў іх дадатковых сіл і вайсковай тэхнікі, каб прарваць абарону ўкраінцаў і выйсьці на адміністратыўныя межы Данецкай вобласьці.
Чым важныя Бахмут і Салядар
Бахмут (з 1924 па 2016 гг. — Арцёмаўск) — цэнтар саляной прамысловасьці, буйны чыгуначны вузел. Такі статус Бахмут меў да поўнамаштабнага расейскага ўварваньня ў 2022-м. У горадзе пражывалі болей за 80 тысяч чалавек. Расейскія прапагандысты нярэдка наўмысна называюць горад Арцёмаўскам, старой савецкай назвай. Бахмут беспасьпяхова спрабуюць узяць амаль год, украінскія войскі адбіваюць усе атакі.
Салядар знаходзіцца ў Бахмуцкім раёне Данецкай вобласьці, за 11 кілямэтраў ад Бахмута. Мае дзьве чыгуначныя станцыі. Тут знаходзілася найбуйнейшае ва Ўкраіне прадпрыемства па вытворчасьці солі «Арцёмсоль». У горадзе да вайны пражывалі 10,5 тысячы чалавек.
Паводле ўкраінскіх уладаў, у выніку баявых дзеяньняў абодва гарады маюць вялікія разбурэньні.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
