Найбольш жорсткія баі цяпер адбываюцца ў Данецкай вобласьці, каля гарадоў Бахмут і Салядар.
Як паведаміў у эфіры ўсеўкраінскага тэлемаратону #UAРазом сьпікер Усходняй групоўкі Ўзброеных сіл Украіны Сяргей Чараваты, за апошнія 24 гадзіны ў Салядары адбылося 22 баявыя сутыкненьні. Расейцы 106 разоў абстралялі горад.
«Учора (8 студзеня) былі выдзеленыя камандзірам, якія там у Салядары, дадатковыя сіла і сродкі. Салядар на пастаянным кантролі. Я мяркую, што супольнымі намаганьнямі ўдасца стабілізаваць становішча», — сказаў Сяргей Чараваты.
Расейскі бок неаднаразова заяўляў аб прасоўваньні ў Салядары і Бахмуце, аднак украінскі бок гэта кожны раз зьняпраўджвае.
Намесьніца міністра абароны Ўкраіны Ганна Маляр заявіла аб складанай сытуацыі на ўсходзе і асабліва каля Салядару.
«На некаторых участках Данецкай вобласьці мы патроху, крок за крокам, прасоўваемся наперад. А на некаторых наступае вораг. Наступае ня толькі рэгулярная армія, але і прыватныя», — паведаміла Ганна Маляр.
Паводле яе, большая частка ўкраінскай арміі — не прафэсійныя вайскоўцы, а мабілізаваныя.
Расейцы атакуюць Бахмут і Салядар ужо некалькі месяцаў запар, але ў апошнія дні яны павялічылі націск.
Украінскія вайскоўцы сьцьвярджаюць, што расейскае камандаваньне і ўдзень, і ўначы накіроўвае ў горад штурмавыя групы з дэсантнікаў і вайскоўцаў прыватнай кампаніі «Вагнэр».
Бахмут (з 1924 па 2016 гг. — Арцёмаўск) — колішні цэнтар саляной прамысловасьці, буйны чыгуначны вузел. Такі статус Бахмут меў да поўнамаштабнага расейскага ўварваньня ў 2022-м. У горадзе пражываюць болей за 80 тысяч чалавек. Расейскія прапагандысты нярэдка наўмысна называюць горад Арцёмаўскам, старой савецкай назвай. Бахмут беспасьпяхова спрабуюць узяць паўгода, украінскія войскі адбіваюць усе атакі.
Салядар знаходзіцца ў Бахмуцкім раёне Данецкай вобласьці, за 11 кілямэтраў ад Бахмута. Мае дзьве чыгуначныя станцыі. Тут знаходзілася найбуйнейшае ва Ўкраіне прадпрыемства па вытворчасьці солі «Арцёмсоль». У горадзе да вайны пражывалі 10,5 тысячы чалавек.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
