Пасьля расейскага абстрэлу 23 лістапада большасьць жыхароў Украіны, з словаў украінскіх энэргетыкаў, засталіся без электрычнасьці. Часова спынілі працу большасьць ЦЭЦ і ГЭС Украіны, у некаторых рэгіёнах узьніклі праблемы з водазабесьпячэньнем. Міністар унутраных справаў Украіны Дзяніс Манастырскі паведаміў, што ў выніку ракетных удараў загінулі 10 чалавек, пацярпелі тры шматпавярхоўкі.
З словаў Канашэнкава, мэта ўдару была дасягнутая, паражаны ўсе вызначаныя абʼекты, у тым ліку «парушанае перакідваньне чыгуначным транспартам рэзэрваў Узброеных сіл Украіны, замежнага ўзбраеньня, вайсковай тэхнікі і боепрыпасаў у раёны баявых дзеяньняў».
«Хачу падкрэсьліць, што ніводнага ўдару па абʼектах у горадзе Кіеве не наносілася. Усе разбурэньні ў горадзе, абвешчаныя кіеўскім рэжымам, сталі вынікам падзеньня ракет замежных і ўкраінскіх сродкаў СПА, разьмешчаных у жылых раёнах украінскай сталіцы», — сьцьвярджае Канашэнкаў.
Прэс-сакратар прэзыдэнта Расеі Дзьмітрый Пяскоў на пытаньне, ці хвалюе Крэмль, як удары расейскіх вайскоўцаў па абʼектах крытычнай інфраструктуры ўплываюць на жыцьцё простых украінцаў, адказаў: «Спэцыяльная ваенная апэрацыя выконвае свае задачы. Удараў па сацыяльных аб’ектах як не было, так і няма».
- Як паведамлялі раней, 23 лістапада Расея нанесла чарговы інтэнсіўны ракетны ўдар па Кіеве і іншых паселішчах Украіны. Паводле ўладаў, у выніку атакі на Кіеў загінулі тры чалавекі, у тым ліку 17-гадовая дзяўчына. Яшчэ 11 чалавек атрымалі раненьні. Паводле зьвестак паліцыі, усяго загінулі шэсьць чалавек, яшчэ 36 параненыя.
- Як паведамілі ў Генэральным штабе Ўзброеных сілаў Украіны, удары з боку расейцаў трапілі ў жылыя дамы, ЦЭЦ і падстанцыі ў Кіеве, Кіеўскай, Віньніцкай, Львоўскай і Запароскай вобласьцях. Расея выпусьціла па Ўкраіне 70 ракет, большасьць іх зьбілі сілы СПА.
