«Я прадала машыну вельмі выгадна, як і мой пляменьнік»
Аксана (імёны ўсіх суразмоўцаў зьмененыя. — РС) увесну зьехала з Беларусі ў Польшчу. Жанчына прыехала на сваім аўтамабілі. Але нядаўна вырашыла яго прадаць у Беларусі.
«Бо цяпер такая сытуацыя, што ўсе машыны вельмі добра прадаюцца. Мяне напружвала, што мой аўтамабіль на беларускіх нумарах. Бо афіцыйна на іх можна езьдзіць у Польшчы толькі шэсьць месяцаў. Калі рабіць усё правільна, то трэба заплаціць за яго мыта. Гэта лішнія выдаткі. Вырашыла прадаць аўта ў Беларусь», — кажа Аксана.
Сама яна пабаялася ехаць на Радзіму, бо ня раз трапляла ў міліцыю, яе каралі штрафамі за «падпіску на дэструктыўныя рэсурсы». Аксана аформіла даверанасьць на сябра, гэта каштавала 25 злотых. Столькі ж заплаціла, каб засьведчыць подпіс. Сябра паехаў у Беларусь і прадаў там машыну.
«Гэта быў Citroën 2011 году выпуску. Мы яго купілі ў 2011 годзе за 19 тысяч даляраў. Тады ён быў практычна новы, была адна гаспадыня, але яна ня езьдзіла на ім. Цяпер прадалі за 6700 даляраў. Можна было і больш грошай выручыць, але мы сьпяшаліся. Думаю, каб не сьпяшаліся, то і за 8 тысяч даляраў маглі б прадаць. Прадалі вельмі хутка. Толькі разьмясьцілі абвестку — і тут жа адгукнуўся пакупнік. Ён і ўзяў аўта», — дадала Аксана.
Жанчына кажа, што выгадна прадаў аўтамабіль нядаўна і яе пляменьнік, які жыве ў Беларусі.
«Машыны проста „зьлятаюць“. Расейцы актыўна скупляюць усё, што ёсьць. Беларусы, якія хацелі купіць аўта і цягнулі, цяпер спужаліся, што ім нічога не застанецца, і таксама пачалі набываць», — кажа беларуска.
Узамен прададзенага аўтамабіля яна пакуль нічога не набыла.
«Вагаюся, ці наагул мне пакуль трэба аўтамабіль, бо ў горадзе, дзе я жыву, праблема з паркоўкамі», — дадала Аксана.
«Купіў за 2250 даляраў, прадаў за 3400»
Беларус Раман у 2021 годзе мусіў зьехаць у іншую краіну. Ён меў аўтамабіль Chrysler Sebring.
«Купіў яго ў 2019 годзе з прабегам 180 тысяч кілямэтраў. Аўта 2002 году выпуску. Заплаціў 2250 даляраў. Былі праблемы з кузавам, але мае сябры зрабілі ўсё якасна і танна. За ўсё, каб машына была ў парадку, заплаціў яшчэ тысячу даляраў. У 2021 вырашыў хуценька прадаць. Аддаў у салён, бо сам выехаў з краіны. Паставілі машыну на продаж за 3500 даляраў. У выніку прадалі за 3400, 500 аддаў за паслугу салёну, на рукі атрымаў 2900. Лічу, што продаж быў выгадным для мяне», — расказаў Раман.
Ён дадаў, што аўта было ў добрым стане, «практычна ідэальным».
«Прадалі, бо ў Польшчы за такія грошы можна купіць лепшае аўта»
Марыя ўлетку зь сям’ёй перабралася ў Польшчу. Яна мела аўтамабіль Opel Zafira 2008 году выпуску. Вырашыла прадаць машыну зь дзьвюх прычынаў: у Польшчы зь беларускімі нумарамі езьдзіць можна толькі шэсьць месяцаў, за такія ж грошы ў Польшчы можна купіць лепшае аўта.
«Набылі мы машыну ў 2012 годзе за 15 тысяч даляраў. Прабег быў тады 120 тысяч кілямэтраў. Вось яшчэ 10 гадоў каталіся. Дарэчы, аўта тады было прыгнанае з Польшчы. Я нядаўна паехала ў Беларусь і хутка прадала знаёмаму за 6 тысяч даляраў. Тут у Польшчы такое аўта каштуе 3500. Аўтамабіль быў у добрым стане, але з касмэтычнымі дэфэктамі — іржа на кузаве», — сказала Марыя.
Замест старой машыны яны з мужам купілі ў Польшчы Citroёn 2013 году выпуску за 5 тысяч даляраў.
«Адзін мінус, што на ім не паедзеш у Беларусь. Бо ён на польскіх нумарах, значыць, трэба будзе пры перасячэньні мяжы пакідаць заклад на суму мыта. Прычым пакідаеш заклад у эўра ці далярах, вяртаюць жа ў беларускіх рублях і паводле нізкага курсу», — дадала Марыя.
Яна лічыць, што магла б прадаць аўта ў Беларусі і даражэй «з улікам ажыятажу». Але не было часу чакаць.
Што кажуць пра рынак новых аўтамабіляў у Беларусі экспэрты
Беларуская аўтамабільная асацыяцыя на сваім сайце падзялілася зьвесткамі пра стан аўтарынку.
Паводле БАА, рынак новых легкавых аўтамабіляў у кастрычніку 2022 году паказаў нязначны прырост у параўнаньні з верасьнем. Прадалі 452 легкавыя аўтамабілі, што на 86% менш у параўнаньні з кастрычнікам 2021 году. Рост стаў магчымы за кошт нарошчваньня аб’ёмаў продажу маркі Geely. І агульная доля кітайскіх марак у кастрычніку павялічылася да 62%.
Продажы астатніх брэндаў рэзка скарачаюцца. Брэнды, якія яшчэ вырабляюць для продажу, скарацілі аб’ёмы ў сярэднім на 95% у параўнаньні з 2021 годам. У выніку 10 месяцаў 2022 году рынку лідэрам застаецца марка Lada — 3 631 аўтамабіль.
Асацыяцыя піша, што цэны на аўтамабілі з траўня не павышаліся, на пэўныя маркі — зьменшыліся. Афіцыйны аўтамабільны рынак (пастаўкі машын афіцыйнымі каналамі да дылера. — РС) новых легкавых аўтамабіляў за год абрынуўся ў 10 разоў.
«У пэрыяд санкцыяў і паступовага сыходу з рынку (або часовага „замарожваньня“ дзейнасьці) большасьці марак відавочна, што ільвіная доля цяперашняга продажу новых (ці амаль новых, зь невялікім прабегам) аўтамабіляў — гэта пастаўкі, якія мы называем паралельным імпартам, якія закупляюць іншымі каналамі, прывозяць ў Беларусь з ускладненай лягістыкай, іншым цэнаўтварэньнем. Такія пастаўкі могуць у разы перавышаць афіцыйныя. І рэальны аб’ём рынку можа быць у два‐тры разы вышэйшы», — кажа Сяргей Самойла, сябра праўленьня Асацыяцыі.
