Замест таго, каб паціснуць руку суперніцы пасьля заканчэньня матчу ўкраінская тэнісістка пачакала яе каля сеткі з паднятай у руках ракеткай, якую Азаранка закранула сваёй ракеткай.
Паводле самой Касьцюк, перад матчам яна адправіла Азаранцы SMS, у якой папярэдзіла яе, што звыклага поціску рукі на корце ня будзе.
«Я проста ня думаю, што гэта правільна рабіць у тых абставінах, у якіх я зараз знаходжуся. Я ня ведаю ніводнага чалавека, які б публічна асуджаў вайну і дзеяньні іх ураду, таму я не адчуваю, што магу такое падтрымаць», — сказала Касьцюк на прэс-канфэрэнцыі пасьля матчу, піша tennis.com.
«Зь некаторымі зь іх у мяне былі асабістыя адносіны, але яны да мяне нават не падышлі. А ў некаторых вельмі шмат заўзятараў, якія на іх раўняюцца. Але яны не выкарыстоўвалі свагёй плятформы, каб пашырыць правільны пасыл, што яны не падтрымліваюць вайны», — патлумачыла ўкраінская тэнісістка.
Паводле Касьцюк, яна ня мае ніякай непрыязнасьці да Азаранкі асабіста, аднак у той вялікі ўплыў па-за межамі тэнісу, у Беларусі, і яна «магла б зрабіць больш».
Азаранка, у сваю чаргу, сказала на прэс-канфэрэнцыі, што не была зьдзіўленая ўчынкам Марты Касьцюк, аднак ня лічыць гэта такой «важнай гісторыяй».
«Калі ў сакавіку ўсё здарылася, я зьвязалася з усімі ўкраінскімі гульцамі, зь якімі ў мяне ёсьць асабістыя адносіны. Але я не хачу навязвацца тым, хто можа не хацець са мной размаўляць, — сказала Азаранка. — Мне падаецца, у мяне з самага пачатку быў вельмі выразны пасыл аб гатоўнасьці дапамагаць, што я і зрабіла зь лішкам. Можа, не голасна. Але я і не для таго гэтым займаюся. Я дапамагаю тым, каму патрэбна дапамога: юніёрам, у якіх няма адзеньня, людзям, якім патрэбны грошы ці транспарт. Для мяне важна дапамагаць тым, хто мае патрэбу.
Калі Марта захоча са мной пагаварыць, я гатовая, — дадала яна. — Я заўсёды гатова выслухаць, паспрабаваць зразумець. Я лічу, што цяпер найважнейшае — спагада. Сытуацыя ў сьвеце вельмі складаная, але нельга забываць, што мы ўсе людзі і павінны ставіцца адно да аднаго па-чалавечы».
Азаранка перамагла Касьцюк у двух згуляных сэтах.
Марта Касьцюк, якая займае 65-ы радок у сусьветным рэйтынгу гульцоў, з пачатку расейскага ўварваньня ва Ўкраіну рэгулярна выступае з асуджэньнем вайны і імкнецца прыцягнуць увагу да наступстваў расейскай агрэсіі супраць Украіны.
У красавіку яна разам зь іншымі ўкраінскімі гульцамі заклікала забараніць расейскім і беларускім тэнісістам удзельнічаць у міжнародных спаборніцтвах, калі яны не пагодзяцца публічна асудзіць вайну.
