На зваротным шляху яе затрымалі ўкраінскія памежнікі за незаконнае перасячэньне мяжы і склалі акт аб адміністрацыйным правапарушэньні.
У судзе беларуска паведаміла, што вымушана была ехаць у Беларусь праз Польшчу, бо беларуска-ўкраінская мяжа закрытая, а консульства Беларусі ва Ўкраіне, дзе яна магла б абмяняць пашпарт у сувязі з заканчэньнем тэрміну дзеяньня, не працуе. Ва Ўкраіне яна мае сям’ю і від на сталае пражываньне.
Памяняўшы пашпарт, яна не змагла атрымаць польскую візу, каб вярнуцца тым жа шляхам, таму вырашыла перасячы беларуска-ўкраінскую мяжу, нягледзячы на тое, што пункты пропуску закрытыя ў сувязі з ваеннай агрэсіяй Расеі супраць Украіны. У Беларусі, як яна падкрэсьліла, ёй не было дзе жыць.
У Жытомірскай вобласьці яе затрымалі ўкраінскія памежнікі і накіравалі ў суд матэрыялы аб прыцягненьні грамадзянкі Беларусі да адказнасьці: паводле ўкраінскага заканадаўства, ёй пагражалі штраф або арышт да 15 сутак.
Але суд выслухаў яе гісторыю і закрыў справу, не знайшоўшы складу адміністрацыйнага правапарушэньня.
Усе супрацоўнікі амбасады Беларусі ва Ўкраіне на чале з паслом Ігарам Сокалам выехалі з Украіны 19 сакавіка 2022 году. У якасьці прычыны эвакуацыі амбасадар Сокал назваў «невыносныя ўмовы працы — у прыватнасьці, пасольству заблякавалі ўсе фінансавыя рахункі, а супрацоўнікам нібыта паступалі «пагрозы фізычнай расправы».
