Петкаў узначаліў урад усяго паўгода таму і займаў актыўную праэўрапейскую і праэўраатлянтычную пазыцыю.
Апанэнты Петкава абвінавачваюць яго і яго кабінэт міністраў у недастатковых намаганьнях па барацьбе з інфляцыяй. Таксама ў іх ёсьць рознагалосьсі і ў іншых пытаньнях фінансавай палітыкі. Яшчэ адным спрэчным пытаньнем сталі дэбаты аб тым, ці павінна Баўгарыя падтрымаць імкненьне Паўночнай Македоніі стаць кандыдатам у сябры ЭЗ.
Некаторыя аналітыкі мяркуюць, што на рашэньне парлямэнта паўплывала імкненьне Петкава змагацца з карупцыяй ва ўладзе найбяднейшай краіны Эўразьвязу. Раней Петкаў заяўляў, што прычынай падрыхтоўкі вотуму недаверу стала пагроза раскрыцьця буйных карупцыйных схем, у якіх маглі быць замяшаныя баўгарскія палітыкі.
- Пасьля пачатку ваеннага ўварваньня Расеі ва Ўкраіну Петкаў, нягледзячы на шматгадовыя гістарычныя сувязі Баўгарыі з СССР і пазьней Расеяй, цалкам падтрымаў пазыцыю ЭЗ і NATO. Ён звольніў міністра абароны Стэфана Янева, які адмаўляўся называць уварваньне вайной, аддаючы перавагу афіцыйнаму крамлёўскаму тэрміну «спэцапэрацыя».
- Петкаў падтрымаў санкцыі ЭЗ супраць Расеі і паабяцаў украінскім узброеным сілам тэхнічную дапамогу.
