Патрыярх Кірыл усклаў вянок да манумэнта Перамогі ў Менску, пазьней ён плянуе ўскласьці кветкі да помніка мітрапаліту Філарэту і ўзначаліць богаслужэньне ў Сьвята-Духавым катэдральным саборы ў Менску, а заўтра — правядзе літургію ў саборы Ўзвышэньня Сьвятога Крыжа Спаса-Эўфрасіньнеўскага жаночага манастыра ў Полацку.
На 6 чэрвеня заплянаваная сустрэча яго з Аляксандрам Лукашэнкам.
Паведамляецца, што візыт прымеркаваны да сьвяткаваньня 1030-годзьдзя праваслаўя ў Беларусі.
- У суседняй Украіне 31 траўня ўвялі санкцыі супраць патрыярха Кірыла і іншых кіраўнікоў РПЦ за падтрымку вайны ва Ўкраіне.
- Эўразьвяз таксама разглядаў магчымае ўвядзеньне санкцый супраць патрыярха Кірыла, але Вугоршчына настаяла на выключэньні яго са сьпісу індывідуальных санкцый ЭЗ. У выніку ў шосты пакет санкцый, які зацьвердзілі 2 чэрвеня, ён ня трапіў.
- 6 сакавіка кіраўнік РПЦ патрыярх Кірыл заявіў, што пачатак ваенных дзеяньняў зьвязаны з тым, што нейкія сілы восем гадоў спрабавалі «зьнішчыць тое, што існуе ў Данбасе». «Мы ўступілі ў барацьбу, якая мае не фізычнае, а мэтафізычнае значэньне», — заяўляў Кірыл, крытыкуючы краіны Захаду.
- Таксама патрыярх Кірыл заклікаў вернікаў згуртавацца ў складаны для краіны час, у тым ліку вакол улады, і казаў, што ў ваенны час служба ў войску — гэта сапраўдны подзьвіг.
- 27 красавіка Сабор Украінскай праваслаўнай царквы Маскоўскага патрыярхату прыняў рашэньне аб поўнай незалежнасьці і самастойнасьці УПЦ, выказаўшы нязгоду з пазыцыяй Патрыярха Маскоўскага і ўсяе Русі Кірыла наконт вайны ва Ўкраіне.
