На гэта зьвярнула ўвагу выданьне «Медиазона», вывучыўшы партал прававых актаў і парадкавыя нумары дакумэнтаў. Мяркуючы па іх, у сакавіку было засакрэчана 54% ад усіх указаў Пуціна, у красавіку — 49%. Вышэйшы гэты паказчык быў толькі ў сьнежні 2002 году (59%) — тады, нагадвае «Медиазона», ішла другая чачэнская вайна, а ўнутры краіны адбылося мноства тэрактаў.
Выданьне адзначае, што сакрэтнымі ўказамі, у прыватнасьці, пасьмяротна ўзнагароджваюць ордэнамі вайскоўцаў. Вывучыўшы паведамленьні розных гарадзкіх і пасялковых адміністрацый аб гібелі расейскіх вайскоўцаў на тэрыторыі Ўкраіны, «Медиазона» паведамляе пра сама меней 600 такіх узнагарод.
Па розных ацэнках, з пачатку ўварваньня арміі РФ на тэрыторыю Ўкраіны загінулі ад 10 да 25 тысяч расейскіх салдат. Мінабароны РФ не паведамляла аб колькасьці загінулых з 25 сакавіка — тады, па вэрсіі ведамства, іх было 1 351.
