Цягнікі змогуць даехаць да нямецкага гораду Мангайм, паведамляе ўрадавы партал China.org.
Новы маршрут праходзіць праз Казахстан, Азэрбайджан, Румынію, Вугоршчыну, Славаччыну і Чэхію. Перасякае Касьпійскае і Чорнае моры камбінаваным чыгуначным і марскім транспартам. 13 красавіка зь Сіаню адправіўся першы цягнік, загружаны спартовымі таварамі.
Новы маршрут праходзіць праз краіны і рэгіёны, празь якія рэдка праяжджаюць цягнікі з Кітаю. У міжнароднай лягістычнай кампаніі зь сядзібай у Сіане лічаць, што эфэктыўнасьць такіх перавозак павялічыцца, а выдаткі зьменшацца. Такі маршрут «дапаможа наладзіць экспарт у цяперашняй сытуацыі», — кажа мэнэджар кампаніі.
На пачатку сакавіка расейская газэта «Ведомости» са спасылкай на некалькі крыніц паведаміла, што кітайскія грузаадпраўшчыкі пачалі прыпыняць транзыт тавараў праз Расею ў ЭЗ. Чыгуначны рух практычна спыніўся, піша выданьне.
Супрацоўнік эўрапейскай лягістычнай кампаніі паведаміў газэце, што некаторыя кітайскія вытворцы, якія традыцыйна перавозяць тавары па чыгунцы, пачалі пераарыентоўвацца на марскі і аўтамабільны транспарт. У Расейскай чыгунцы гэтага тады не пацьвердзілі.
- Пасьля ўварваньня расейскіх войскаў ва Ўкраіну і пачатку вайны дзясяткі краін абвясьцілі пра санкцыі супраць асобных расейскіх кампаній і іх грамадзян (пераважна палітыкаў і ўладальнікаў буйнога бізнэсу, набліжаных да прэзыдэнта Пуціна). Замежныя кампаніі масава пакідаюць Расею: прыпыняюць пастаўкі тавараў, закрываюць расейскую вытворчасьць або перадаюць яе мясцовым уладам.
- На сёньняшні дзень больш за 750 замежных кампаній заявілі аб прыпыненьні або поўным спыненьні дзейнасьці на расейскім рынку. Сярод іх — кітайская дзяржаўная нафтагазавая кампанія Sinopek, якая прыпыніла інвэстыцыйную дзейнасьць у Расеі, баючыся трапіць пад другасныя санкцыі ЗША.
