«Я і ня ведаў, але, аказваецца, каб стаць патрыётам сваёй краіны, трэба раскрытыкаваць дзеяньні Расеі, зьехаць за мяжу, прычым гучна і патасна, стварыўшы шуміху вакол пэрсоны, а потым, калі палітычны градус супрацьстаяньня ўпадзе, вярнуцца назад як ні ў чым не бываў», — напісаў Рамзан Кадыраў.
Кадыраў дадаў, што «шкала прыярытэтаў у Пяскова нейкая нясталая» і «трэба з гэтым нешта рабіць».
Таксам Кадыраў раскрытыкаваў Пяскова і за тое, што той не павіншаваў яго з прысваеньнем Кадыраву званьня генэрал-лейтэнанта.
Раней Дзьмітры Пяскоў, адказваючы на пытаньні журналістаў, заявіў, што ня ўсіх, хто не падтрымаў так званую «спэцыяльную ваенную апэрацыю» расейскіх войскаў на тэрыторыі Ўкраіны, а таксама ня ўсіх, хто зьехаў з Расеі, трэба запісваць у здраднікі і «пятую калёну».
«Тэлевядоўца Іван Ургант — вялікі патрыёт, я добра яго ведаю, у яго можа быць свой пункт гледжаньня, але ён патрыёт», — сказаў прэс-сакратар прэзыдэнта РФ.
Пры гэтым, на думку Пяскова, сярод тых, хто выступае супраць вайны, ёсьць і «ворагі дзяржавы»: «Людзі, якія ня проста не зразумелі, ня проста спалохаліся, але сталі ганіць уладу, нападаць на герояў-вайскоўцаў — вось гэта ворагі дзяржавы, і зь імі мы будзем змагацца».
Іван Ургант зь сям’ёй зьехаў у Ізраіль 24 лютага, пакінуўшы ў сваім інстаграме запіс: «Страх і боль. Не — вайне». Праграма «Вечерний Ургант» перастала выходзіць у этэр расейскага Першага канала, але прэс-служба не пацьвярджала інфармацыю аб закрыцьці шоў. Пазьней Іван Ургант напісаў, што паехаў у адпачынак і вернецца ў Расею.
