У Мікалаеве намагаюцца высьветліць лёс Тацяны Дзяменьнікавай, якая працавала ў эканамічным дэпартамэнце абласной адміністрацыі і ачольвала Мікалаеўскае абласное нацыянальна-культурнае таварыства беларусаў «Голас Радзiмы».
«У момант выбуху наша Тацяна была на працы, цяпер працягваюць ратавальныя працы. Яе яшчэ не знайшлі. Мы спадзяемся на лепшае», — паведаміла Свабодзе намесьніца старшыні беларускай суполкі «Голас Радзімы» Тацяна Бусько.
Тацяна дадала, што пасьля пачатку вайны яна ня зьвязвалася з амбасадай Беларусі ва Ўкраіне і ёй ніхто не тэлефанаваў, каб пацікавіцца сытуацыяй.
«Не хацелася б, каб радзіма ў сьпіну стрэльнула»
«Я грамадзянка Беларусі, маю ва Ўкраіне від на жыхарства ўжо больш за 25 гадоў. Ніхто са мной адтуль ня зьвязваўся і я не тэлефанавала», — кажа Тацяна Бусько.
На пытаньне, ці зьмянілася стаўленьне ўкраінцаў да беларусаў у Мікалаеве пасьля таго, як з тэрыторыі Беларусі пачалі абстрэльваць Украіну, Тацяна Бусько адказала:
«Да мяне асабіста стаўленьне не зьмянілася. Магу сказаць ад сябе асабіста. Да вайны і ў час вайны асабіста да мяне і да нашай суполкі стаўленьне як было, такім і засталося. Нас ніхто ня цісьне, на нас ніхто ня фыркае. Проста, разумееце... Такая сытуацыя ня вельмі прыемная, не хацелася б, каб радзіма ў сьпіну стрэльнула».
У Мікалаеве жывуць 480 тысяч чалавек. Паводле апошняга перапісу, які быў у 2001 годзе, беларусы складаюць 0,8% жыхароў абласнога цэнтру.
«Голас Радзiмы» ў Мікалаеве
Мікалаеўскае абласное нацыянальна-культурнае таварыства беларусаў «Голас Радзiмы» зарэгістравалі 28 сьнежня 2015 году. Суполка актыўна падтрымлівала кантакты зь беларускай амбасадай у Кіеве.
Міністэрства замежных справаў Беларусі ўзнагародзіла Тацяну Дзяменьнікаву юбілейным мэдалём «100 гадоў дыпляматычнай службе Беларусi» за значны ўнёсак у разьвіцьцё беларуска-ўкраінскіх культурна-гуманітарных сувязяў.
13 лістапада 2019 году амбасадар Беларусі ва Ўкраіне Ігар Сокал уручыў Тацяне Дзяменьнікавай юбілейны мэдаль, а іншых сяброў суполкі ўзнагародзіў ганаровымі знакамі беларускай амбасады. Тады ж Ігар Сокал перадаў ансамблю «Родныя напевы» беларускія нацыянальныя строі.
29 сакавіка расейцы абстралялі будынак Мікалаеўскай абласной дзяржаўнай адміністрацыі. У выніку сярэдняя частка будынку абвалілася, 19 грамадзян загінулі. Расчыстка завалаў працягваецца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
