У гэтых офісах разьмесьцяцца каманды расейскай і беларускай службаў RFE/RL і кругласутачнай глябальнай лічбавай і тэлевізійнай сеткі «Настоящее время».
Таксама бюро ў Вільні і Рызе стануць базай для новых праектаў журналісцкіх расьсьледаваньняў і цэнтраў лічбавых інавацый.
Прэзыдэнт РСЭ/РС Джэймі Флай сказаў з нагоды адкрыцьця новых бюро:
«Гэтыя новыя бюро дазволяць РСЭ/РС працягваць узаемадзейнічаць з нашай аўдыторыяй у Расеі і Беларусі, нягледзячы на ўсе намаганьні гэтых урадаў прымусіць замаўчаць незалежную журналістыку. Радыё Свабодная Эўропа / Радыё Свабода пашырыць свае ўжо пасьпяховыя намаганьні па данясеньні да расейскай і беларускай аўдыторыі актуальных навін, якія яны шукаюць і ў якіх маюць патрэбу. Мы ўдзячныя ўрадам Латвіі і Літвы за іх прыхільнасьць да свабоды прэсы і падтрымку ўразьлівых журналістаў, якім давялося шукаць прытулку за межамі сваіх краін».
У Рызе Радыё Свабодная Эўропа / Радыё Свабода плянуе стварыць мультымэдыйны цэнтар, у якім будуць разьмяшчацца супрацоўнікі Расейскай службы і «Настоящего времени», перамешчаныя з Расеі. У латвійскай сталіцы таксама разьмесьціцца новае расейскамоўнае падразьдзяленьне журналісцкіх расьсьледаваньняў і цэнтар лічбавых інавацый, прызначаны супрацьдзейнічаць дэзынфармацыі і распрацоўваць стратэгіі абыходу онлайн-цэнзуры на розных плятформах дастаўкі.
Віленскае бюро навін у першую чаргу прыме звольненых журналістаў Беларускай службы, вымушаных уцякаць з радзімы пасьля фальсыфікаваных выбараў 2020 году, а таксама новую групу рэпартэраў, створаную «Настоящим временем» дзеля задавальненьня патрэб расейскамоўнай аўдыторыі сеткі ў Беларусі.
Уплыў Радыё Свабодная Эўропа / Радыё Свабода на працягу першых двух тыдняў вайны Расеі з Украінай дэманструе жаданьне Расеі і Беларусі атрымаць непадцэнзурную альтэрнатыву крамлёўскім СМІ, каб ведаць пра поўны маштаб канфлікту.
З 24 лютага па 16 сакавіка колькасьць праглядаў відэа РСЭ/РС на YouTube з Расеі павялічылася ў тры разы і дасягнула амаль 238 мільёнаў, а колькасьць наведваньняў, праглядаў старонак і ўнікальных наведвальнікаў яго вэб-сайтаў з Расеі вырасла на 34 працэнты, 51 працэнт і 53 працэнты адпаведна.
Што тычыцца Беларусі, то колькасьць праглядаў відэа РСЭ/РС праз YouTube унутры краіны павялічылася ў чатыры разы (да 22,4 млн). Колькасьць наведваньняў (158%), праглядаў старонак (148%) і ўнікальных наведвальнікаў (110%) зь Беларусі на сайтах РСЭ/РС таксама рэзка павялічылася.
РСЭ/РС глыбока ўдзячная ўрадам Латвіі і Літвы за падтрымку місіі РСЭ/РС і стварэньне гэтых новых бюро.
Перасьлед Андрэя Кузьнечыка
- Андрэй Кузьнечык — журналіст, які супрацоўнічае з Радыё Свабода, фрылансэр.
- Андрэя Кузьнечыка затрымалі 25 лістапада, на наступны дзень яго асудзілі на 10 сутак, аднак 5 сьнежня ён на волю не выйшаў, зноў атрымаўшы 10 сутак. Але і 15 сьнежня яго ня вызвалілі і зноў прысудзілі 10 дзён арышту.
- Віны паводле адміністрацыйных артыкулаў фрылансэр Радыё Свабода не прызнаў, перадач для яго не прынялі.
- 22 сьнежня Беларуская асацыяцыя журналістаў запатрабавала ад уладаў органаў неадкладна даць інфармацыю пра тое, дзе і ў сувязі зь якой справай утрымліваюць журналіста.
- Прэзыдэнт Радыё Свабода Джэймі Флай заявіў, што ўлады Беларусі працягваюць утрымліваць журналіста, па сутнасьці, як выкрадзенага закладніка. Ён запатрабаваў вызваліць Андрэя і спыніць перасьлед беларускіх журналістаў.
- 23 сьнежня сваякам Андрэя паведамілі, што на яго завялі крымінальную справу, але не назвалі артыкулу КК. Кузьнечыка перавялі ў СІЗА-1 на вуліцы Валадарскага ў Менску.
- У чэрвені 2022 году Магілёўскі абласны суд прызнаў яго стваральнікам «экстрэмісцкага фармаваньня» (арт. 361-1 КК) і прысудзіў 6 гадоў турмы. Суд доўжыўся 3 гадзіны.
