Расея і Ўкраіна скончылі перамовы ў Турэччыне
Міністры замежных спраў Украіны і Расеі Дзьмітро Кулеба і Сяргей Лаўроў не змаглі дамовіцца аб спыненьні абстрэлаў на 24 гадзіны для эвакуацыі мірнага насельніцтва з Марыюпалю.
Украінскія энэргетыкі назвалі правакацыяй заяву беларускага боку аб гатоўнасьці дапамагчы на ЧАЭС
«Укренерго» адказала на прапанову беларускага боку, заявіўшы, што ня мае патрэбы ў дапамозе пры рамонце пашкоджанай расейскімі абстрэламі высакавольтнай лініі, якая сілкавала Чарнобыльскую АЭС.
«Патрэбна спыненьне агню і вызваленьне нашых рамонтных брыгад, якія з учорашняга дня чакалі ўзгадненьня на рамонт. Мы гатовыя неадкладна адрамантаваць лініі і аднавіць электразабесьпячэньне Чарнобыльскай АЭС, якая больш за суткі без электрычнасьці. Проста спыніце страляніну і ўпусьціце нашы рамонтныя брыгады!»
Таксама «Укренерго» падкрэсьліла, што «ўсе паведамленьні расейскіх і беларускіх СМІ аб сілкаваньні ЧАЭС зь Беларусі зьяўляюцца правакацыяй, накіраванай на абвастрэньне сытуацыі».
Расея адразу пасьля перамоў з Украінай у Турэччыне аднавіла абстрэлы заблякаванага Марыюпалю
Марыюпальская гарадзкая рада паведаміла аб пачатку Расеяй новых авіяўдараў па Марыюпалі, якія аднавіліся адразу пасьля ўкраінска-расейскіх перамоў у Турэччыне.
«Бомбы трапляюць у жылыя будынкі. Пацэлілі таксама ў корпус Прыазоўскага дзяржаўнага тэхнічнага ўнівэрсытэту ў цэнтры гораду. Таксама зафіксавана бамбардаваньне ў раёне драматычнага тэатру», — паведаміла Марыюпальская гарадзкая рада.
Яшчэ 14 вайскоўцаў Узброеных сіл Украіны атрымалі званьне Героя Ўкраіны. Шэсьць зь іх — пасьмяротна
Прэзыдэнт Зяленскі прысвоіў званьне Героя Ўкраіны 14 вайскоўцам, у тым ліку шасьці — пасьмяротна.
Офіс прэзыдэнта Ўкраіны: Расея пераходзіць на «сырыйскі сцэнар» зьнішчэньня ўкраінскіх гарадоў
Дарадца Офісу прэзыдэнта Ўкраіны Аляксей Арастовіч заявіў аб тым, што Расея зьмяняе тактыку вайсковых дзеяньняў і пераходзіць на «сырыйскі сцэнар» бамбаваньня Ўкраіны.
«Стала зразумела, што вораг канчаткова зьмяніў тактыку і, будучы няздольны нанесьці паражэньне нашым узброеным сілам і іншым сілам абароны на полі бою, перайшоў да так званага сырыйскага варыянту — аблога і тэрор вялікіх і малых гарадоў, каб найбольш цярпела цывільнае насельніцтва», — сказаў Аляксей Арастовіч 10 сакавіка на брыфінгу ў Кіеве.
Паводле яго, цяпер «зносяць» Марыюпаль, каб потым паказваць і пытацца: «Вы хочаце так, як у Марыюпалі?!»
«Таксама цярпяць Харкаў, Ахтырка і цяпер Мікалаеў».
Сярод беларусаў, якія далучыліся да абароны Ўкраіны, яшчэ адзін паранены
Беларускія добраахвотнікі, якія далучыліся да абароны Ўкраіны, паведамілі, што ў іх яшчэ адзін паранены.
Раней стала вядома, што ў баях пад Бучай Кіеўскай вобласьці загінуў беларус Ільля «Літвін» Хрэнаў. Разам зь ім у баі ўдзельнічалі яшчэ некалькі беларускіх добраахвотнікаў, адзін зь іх атрымаў раненьне, яму ампутавалі нагу.
Віцэ-прэзыдэнт ЗША Камала Гарыс: ЗША ахвяруюць 50 мільярдаў даляраў на гуманітарную дапамогу для Ўкраіны ў рамках харчовай праграмы
Акрамя таго, паводле слоў Гарыс, амэрыканскі кангрэс паабяцаў ахвяраваць 13,5 мільярда даляраў гуманітарнай дапамогі, якая будзе разьмеркаваная паміж Украінай і астатнім сэктарам Цэнтральнай і Ўсходняй Эўропы для гуманітарнай падтрымкі ахвярам расейскай агрэсіі.
На захопленых расейскім войскам тэрыторыях поўдня Ўкраіны, прылеглых да Крыму, пачаліся арышты і ператрусы
Ёсьць інфармацыя, што першай арыштаванай ФСБ Расеі стала Лэйла Ібрагімава, дырэктарка Мелітопальскага гістарычнага музэю. У прыватнасьці, пра гэта паведамляе ўкраінскі пісьменьнік, выкладчык і сцэнарыст Андрэй Куркоў.
Фінская, швэдзкая і дацкая газэты будуць публікаваць артыкулы пра вайну ва Ўкраіне па-расейску з прычыны ўвядзеньня ў Расеі ваеннай цэнзуры і зьнікненьня свабодных СМІ
«Грамадзяне Расеі таксама павінны мець права на незалежную інфармацыю. Тое, што адбываецца зараз ва Ўкраіне, — гэта трагедыя, якую нельга падаваць расейцам праз прызму расейскай прапаганды», — гаворыцца ў паведамленьні выданьняў.
У акцыі ўдзельнічаюць тры газэты: фінская Helsingin Sanomat, швэдзкая Dagens Nyheter і дацкая Politiken. Пра гэта яны напісалі на расейскай мове на сваіх сайтах.
Колькасьць уцекачоў з Украіны з пачатку вайны перавысіла адзнаку ў 2 мільёны 316 тысяч чалавек.
Пра гэта паведамляе агенцтва ААН па справах бежанцаў. Большасьць зь іх накіравалася ў Польшчу, іх колькасьць перавысіла 1,4 мільёна чалавек.
Зяленскі падпісаў закон аб нацыяналізацыі расейскіх актываў
Прэзыдэнт Украіны Ўладзімір Зяленскі падпісаў закон аб прымусовым адабраньні аб’ектаў, уладальнікамі якіх зьяўляюцца Расейская Фэдэрацыя і яе рэзыдэнты, «на карысьць дзяржавы Ўкраіна».
Пра гэта паведамляе Вярхоўная Рада.
Цяпер дзяржава можа канфіскоўваць рухомую і нерухомую маёмасьць, сродкі, уклады ў банках, каштоўныя паперы, карпаратыўныя правы, іншую маёмасьць (актывы), якія ёсьць (зарэгістраваныя) на тэрыторыі Ўкраіны.
Пры абстрэле гораду Корасценя на Жытоміршчыне загінулі два беларусы-дальнабойнікі
Пра гэта паведаміў кіраўнік гораду Ўладзімір Маскаленка. Па ягоных словах, горад бамбілі расейскія самалёты, якія вылецелі зь беларускіх аэрадромаў.
Міністэрства энэргетыкі Беларусі паведаміла аб падачы напружаньня на лініі электраперадачы Мазыр – Чарнобыльская АЭС.
Сусьветная арганізацыя аховы здароўя (САЗ) заявіла, што з пачатку вайны зафіксавала 24 пацьверджаныя выпадкі нападаў на мэдустановы ва Ўкраіне
«У выніку гэтых атак па меншай меры 12 чалавек загінулі і 17 атрымалі раненьні. Як мінімум 8 параненых і 2 забітых былі апазнаныя як мэдыцынскія работнікі», — паведаміла САЗ у электронным лісьце CNN.
Таксама 10 сакавіка міністар аховы здароўя Ўкраіны Віктар Ляшко адзначыў, што з пачатку вайны расейцы абстралялі 63 украінскія бальніцы. У выніку пяць мэдычных работнікаў загінулі і больш за 10 атрымалі раненьні.
Украінскія энэргетыкі адрамантавалі электралінію для аднаўленьня забесьпячэньня электраэнэргіяй ЧАЭС
Рамонтная брыгада кампаніі «Укренерго» атрымала калідор для выезду спэцыялістаў для рамонту пашкоджанай у выніку абстрэлаў лініі электраперадач, якая забясьпечвала энэргіяй ядзерныя аб’екты Чарнобыльскай АЭС, зоны адчужэньня і гораду Славуціча.
Пра гэта паведамляе інфармацыйная кампанія InfoAtom са спасылкай на крыніцы ў «Укренерго».
Віцэ-прэзыдэнт ЗША Камала Гарыс заявіла, што неабходна расьсьледаваць мэтады вядзеньня вайны Расеяй
Паводле словаў віцэ-прэзыдэнта ЗША, расейскае войска дзейнічае ва Ўкраіне зь неверагоднай жорсткасьцю.
Гарыс асудзіла «зьверствы неверагодных маштабаў», якія расейскія вайскоўцы, як яна падкрэсьліла, зьдзяйсьняюць ва Ўкраіне.
Прэзыдэнт Польшчы Анджэй Дуда, удзельнічаючы ў сумеснай прэс-канфэрэнцыі з Камалай Гарыс, канстатаваў, што разбуральныя ракетна-бомбавыя ўдары, якія расейскія войскі наносяць па лякарнях і жылых кварталах гарадоў Украіны, — гэта дэманстрацыя барбарства, якая нагадвае генацыд.
Мэр Кіева Клічко: «З Кіева зьехаў кожны другі жыхар, але сталіца – як крэпасьць»
«Па апошніх падліках, кожны другі кіяўлянін пакінуў горад, крыху менш за два мільёны жыхароў цяпер знаходзяцца ў Кіеве. Тым ня менш, Кіеў цяпер ператварыўся ў крэпасьць», – цытуе словы мэра Кіева Віталя Клічко «Ўкраінская праўда».
Расею западозрылі ва ўжываньні забароненай зброі ў Чарнігаве
Расейскае войска магло выкарыстоўваць запальныя бомбы пры нападзе на Чарнігаў, парушыўшы тым самым міжнародную канвэнцыю. Такую выснову зрабіла дасьледчая група Conflict Intelligence Team, якая вывучыла фота- і відэазапісы ўкраінскай Дзяржаўнай службы па надзвычайных сытуацыях.
На іх дасьледчыкі выявілі фрагмэнты аскепкава-фугасна-запальнай авіябомбы расейскай вытворчасьці ОФЗАБ-500 і адну неразарваную бомбу такога ж тыпу.
Прымяненьне запальнай зброі побач з жылымі зонамі забаронена дадатковым пратаколам да Канвэнцыі аб забароне або абмежаваньні прымяненьня канкрэтных відаў звычайнай зброі.
Парушэньне канвэнцыі можна расцаніць як ваеннае злачынства. Акрамя таго, прымяненьне забароненых сродкаў вайны забаронена расейскім Крымінальным кодэксам.
Кіеў: Украіна чакала расейскага нападу, але не з тэрыторыі Беларусі
Украіна пачала рыхтавацца да расейскага ўварваньня ў лістападзе 2021 году, але не чакала нападу з тэрыторыі Беларусі, заявіў сакратар Рады нацыянальнай бясьпекі і абароны Ўкраіны Аляксей Данілаў.
«Мы не маглі грамадзтву сказаць, што будзе вайна. Гэта было недапушчальна, таму што гэта была адна з тактык Расейскай Фэдэрацыі, каб тут пачаўся хаос», — сказаў Данілаў у эфіры «Свабода Live». Ён дадаў, што ўлады дакладна разумелі, што ўварваньне расейскіх войскаў адбудзецца, але зусім не былі гатовыя да таго, што гэта будзе зьдзейсьнена з боку Беларусі.