Як паведамляецца, да размовы далучылася больш за 200 прадстаўнікоў абедзьвюх амэрыканскіх партый.
«Прэзыдэнт распавёў пра становішча ў краіне, аб ходзе баявых дзеяньняў. У прыватнасьці, ён акцэнтаваў увагу на ваенных злачынствах, учыненых расейскім войскам: абстрэлах школ, жылых дамоў, дзіцячых садкоў, цэркваў. Кіраўнік дзяржавы адзначыў, што ад ракетных абстрэлаў пацярпеў мэмарыял „Бабін Яр“, у выніку чаго загінулі цывільныя грамадзяне», — гаворыцца ў паведамленьні.
Зяленскі таксама зьвярнуў увагу на пагрозу для хімічных і ядзерных аб’ектаў, нагадаўшы аб тым, што расейскія войскі захапілі кантроль над Чарнобыльскай і Запароскай атамнымі электрастанцыямі і рухаюцца ў кірунку Паўднёваўкраінскай АЭС.
Зяленскі чарговы раз сказаў пра неабходнасьць бясьпекі ў небе над Украінай, якую можна забясьпечыць як праз закрыцьцё паветранай прасторы, гэтак і праз пастаўкі самалётаў "савецкай вытворчасьці з краінаў, якія да гэтага часу іх эксплюатуюць". Ён таксама заклікаў і надалей узмацняць санкцыйны ціск на Расею.
На думку Уладзіміра Зяленскага, дадатковымі дзейснымі санкцыямі былі б эмбарга на імпарт усёй расейскай прадукцыі і пазбаўленьне статус найбольшага спрыяньня. Кангрэсмэны задалі Уладзіміру Зяленскаму пытаньні і паабяцалі даць Украіне ўсю магчымую дапамогу», — дадаюць у Офісе прэзыдэнта Ўкраіны.
Раней шэраг лідэраў заходніх краінаў і генэральны сакратар NATO Енс Столтэнбэрг заявілі, што ўвядзеньне беспалётнай зоны азначала б прамы канфлікт NATO з Расеяй. Прэзыдэнт Расеі Ўладзімір Пуцін заявіў, што будзе разглядаць спробы ўстанаўленьня беспалётнай зоны іншымі краінамі як удзел ва ўзброеным канфлікце.
