Падчас абстрэлу Кіева ракета патрапіла ў пункт радыеактыўных адходаў
Пацярпела спэцпрадпрыемства «Радон». Пра гэта паведаміла ядзернага рэгуляваньня Ўкраіны са спасылкай на супрацоўнікаў «Радона».
У гэты час немагчыма ацаніць маштабы разбурэньняў. Аўтаматызаваная сыстэма радыяцыйнага кантролю выйшла са строю. Ацэнка радыяцыйнай абстаноўкі будзе праводзіцца пасьля заканчэньня абстрэлу.
UPD. Надзвычайныя службы ўдакладняюць, што снарад трапіў у агароджу, а сам будынак і ёмістасьці засталіся цэлымі. Паводле папярэдняй ацэнцы, пагрозы для людзей за межамі санітарна-ахоўнай зоны «Радона» няма.
Пад Кіевам гарыць нафтабаза
У супольным эфіры ўкраінскіх тэлеканалаў мэр горада Васількова пад Кіевам Натальля Баласіновіч, паведаміла, што пасьля расейскага абстрэлу гарыць мясцовая нафтабаза.
Выбух на газаправодзе ў Харкаве
Украінскія крыніцы паведамляюць пра моцны ракетна-артылерыйскі абстрэл Харкава расейскімі войскамі і пра выбух на тамтэйшым газаправодзе.
У Харкаве ад абстрэлу жылога дома загінула жанчына
Ратавальныя службы Ўкраіны паведамілі пра абстрэл расейцамі жылога дома ў Харкаве. У выніку яго загінула жанчына, каля 20 чалавек былі эвакуяваныя.
Паведамляецца, што ўвечары 26 лютага снарад трапіў у дзевяціпавярхоўку на вуліцы Бучмы. У выніку абстрэлу зьнішчана частка апорнай сьцяны і лесьвічныя маршы з другога па сёмы паверх, пашкоджаныя кватэры на чацьвёртым, пятым і шостым паверхах.
Абстрэлы Кіева, Харкава і іншых гарадоў Украіны. Што адбывалася ўчора
Хроніка расейскай агрэсіі супраць Украіны 26 лютага.
Украінцы паведамілі, што разьбілі чачэнскі спэцназ пад Кіевам
Украінскія вайскоўцы здолелі зьнішчыць падразьдзяленьне чачэнскіх сілавікоў на чале з камандзірам Магамедам Тушаевым.
Калёну чачэнскага спэцназу зьнішчылі пад пасёлкам гарадзкога тыпу Гастомель, што ля Кіева, паведамляе тэлеканал «Суспільнае» са спасылкай на крыніцу ў офісе прэзыдэнта Ўкраіны. У Гастомелі знаходзіцца вайсковы аэрадром.
Гэтую інфармацыю агенцтву «Інтэрфакс-Украіна» пацьвердзілі ў Міністэрстве абароны Ўкраіны. У прыватнасьці, паведамляецца, што падчас бою загінуў камандзір 141-га мотапалка чачэнскай Расгвардыі генерал Магамед Тушаеў. Гэта пацьвердзіў і палонены баец гэтага спэцназу.
Пацьвяржэнья інфармацыі з расейскага боку няма.
Кіеўскія ўлады: прычынай выбуху нафтабазы пад Васільковам стаў ракетны ўдар Расеі
Расейскія вайскоўцы запусьцілі ракету па нафтабазе ў горадзе Васількове, паведаміў кіраўнік Кіеўскай абласной адміністрацыі Аляксей Кулеба.
«Бітва за аэрапорт працягваецца каля Васількова», – напісаў Кулеба ў Фэйсбуку а палове на трэцюю гадзіну раніцы. Ён таксама дадаў, што з прычыны баёў немагчыма прыступіць да тушэньня.
«У нас прамое пападаньне ў паліўны бак – нам пагражае экалягічная катастрофа. Мы робім усё магчымае, каб гэтага не дапусьціць», – растлумачыў ён.
Пра маштабны выбух і пажар паведаміў і карэспандэнт Радыё Свабода, які знаходзіўся побач.
Украінскія ўцекачы на польскай мяжы
Дзясяткі тысяч украінцаў накіроўваюцца ў суседнія краіны – Польшчу, Славакію, Венгрыю, Румынію і Малдову, – ратуючыся ад расійскага ўварваньня.
За першыя тры дні ўварваньня Расіі ва Ўкраіну толькі ўкраінска-польскую мяжу перасеклі больш за 115 тысяч чалавек, на некаторых памежных пунктах даўжыня чэргаў дасягае 15 кілямэтраў, паведамляе BBC.
МАГАТЭ хвалюецца за лёс атамных станцый ва Ўкраіне пасьля расейскага нападу
Генэральны дырэктар Міжнароднага агенцтва па атамнай энэргіі (МАГАТЭ) Рафаэль Гросі заклікаў забясьпечыць «бясьпеку ядзерных установак і матэрыялаў ва Украіне» пасьля захопу расейскімі салдатамі Чарнобыльскай АЭС.
Горад Мікалаеў застаецца пад кантролем Украіны
Пра гэта расказаў мэр горада Аляксандр Сянкевіч у відэазвароце.
Аб выхадзе расейскіх войскаў на подступы да горада паведамлялася яшчэ два дні таму.
«Сёньня ў горадзе працуе колькі расійскіх ДРГ (дывэрсійна-разведвальных груп), але сытуацыя пад кантролем, танкі і іншая бронетэхніка, якая цяпер знаходзіцца на тэрыторыі горада – украінскія», – сьцьвярджае мэр Мікалаева Аляксандр Сянкевіч.
На Сумшчыне ад расейскіх абстрэлаў загінулі 6 цывільных грамадзян, у тым ліку дзіця
У выніку абстрэлаў гораду Ахтыркі Сумскай вобласьці загінулі шэсьць чалавек, яшчэ 55 атрымалі раненьні. Пра гэта паведаміў кіраўнік Сумскай абласной адміністрацыі Дзьмітро Жывіцкі са спасылкай на мэра горада.
«Пасьля ўчорашняга абстрэлу садка ў шпіталі было двое цяжкіх дзетак. Адна дзяўчынка памерла, 7 гадоў, другое дзіця цяпер у цяжкім стане», – паведаміў Дзьмітро Жывіцкі.
На плятформе Chаnge.оrg зьявілася пэтыцыя з патрабаваньнем імпічмэнту прэзыдэнта Расеі Пуціна
Аўтары пэтыцыі лічаць, што пасьля таго, як Уладзімір Пуцін прыняў рашэньне пачаць ваенную спэцапэрацыю ў дачыненьні да Ўкраіны, становішчу Расеі ў сьвеце была нанесена «непапраўная шкода». «У выніку гэтай агрэсіі на тэрыторыі Ўкраіны гінуць людзі, руйнуецца інфраструктура, зьнішчаецца эканоміка», — указана ў ёй. Пэтыцыю ужо падпісалі больш за 35 тысяч чалавек.
Гарыць падбітая расейскай ракетай нафтабаза ў Васількове пад Кіевам
Тушыць яе замінае бой за вайсковы аэрадром, які працягваецца другія суткі.
Google, AMD і Intel абмяжоўваюць працу ў Расеі
Google прыпыняе манэтызацыю на сваіх плятформах шэрагу расейскіх дзяржаўных СМІ, паведаміла агенцтва Reuters.
Кампаніі AMD і Intel прыпынілі пастаўкі сваёй прадукцыі на тэрыторыю Расеі, гэта можа прывесьці да дэфіцыту сэрвэраў і росту іх кошту, паведамляе РБК са спасылкай на крыніцы на ІТ-рынку.
Instagram заблякаваў яшчэ адзін акаўнт кіраўніка Чачэніі Кадырава
Instagram заблакаваў акаўнт @ya_pomoshnik_kra_95, які вёў кіраўнік Чачэніі, падкантрольны Расеі, Рамзан Кадыраў.
Як паведамляе праект Радыё Свобода «Кавказ.Реалии», старонка налічвала каля 9 мільёнаў падпісчыкаў. Кадыраў скарыстаўся гэтым акаўнтам пасьля таго, як ягоную іншую старонку забараніла сацыяльная сетка.
Фармальна акаўнт быў прысьвечаны турызму ў Чачэніі, а папраўдзе ў ім былі апублікаваныя фота і відэа пра дзейнасьць і жыцьцё кіраўніка і. Кадыраў таксама вёў жывыя трансьляцыі праз гэтую старонку.
Сытуацыя ў Кіеве пад кантролем украінскіх уладаў
Улады Кіева заявілі, што сытуацыя ў горадзе зараз спакойная, сталіца знаходзіцца пад поўным кантролем Узброеных сіл Украіны.
«Уначы было некалькі сутычак з дывэрсійнымі групамі», – паведаміў Мікалай Паварознік, першы намесьнік кіраўніка сталічнай дзяржадміністрацыі.
Ліквідацыя дывэрсійнай групы ў Кіеве
Расейскія ўлады ўпершыню публічна прызналі гібель свайго вайскоўца ў вайне супраць ва Ўкраіне
Кіраўнік Дагестану Сяргей Мелікаў паведаміў аб сьмерці афіцэра Нурмагамеда Гаджымагамедава. Ён праходзіў службу ў паветрана-дэсантных войсках.
Расейскае Мінабароны па-ранейшаму аб стратах сваіх сіл падчас агрэсіі супраць Украіны маўчыць.
Беларусы пратэстуюць супраць расейскай вайны ва Ўкраіне
Беларусы ў розных гарадах краіны і за мяжой выказваюць салідарнасьць з Украінай і пратэстуюць супраць вайны.
Горад Новую Кахоўку на Херсоншчыне захапілі расейцы
Новая Кахоўка ў Херсонскай вобласьці цалкам падкантрольная расейскім войскам, яны захапілі гарвыканкам, зьнялі з будынкаў усе ўкраінскія сьцягі, паведаміў мэр горада Ўладзімір Каваленка.
Найбольшыя тэратарыяльныя страты Ўкраіна панесла ў Херсонскай вобласьці, памежнай з акупаваным яшчэ ў 2014 годзе Крымам.