У Харкаў прарваўся спэцназ Расеі. Ідзе вулічны бой
У горад Харкаў уварвалася група войскаў Расеі. На вуліцы Чарнышэўскага ідзе бой, паведаміў дарадца МУС Ўкраіны Антон Герашчанка. Некалькі машына расейцаў ужо гараць.
Перадышка ў баі за аэрадром ля Васількова на Кіеўшчыне
Другія суткі працягваюцца баі за вайсковы аэрадром ля горада Васількова Кіеўскай вобласьці. Расейцы хочуць яго захапіць для свайго дэсантаваньня. Расейская ракета пацэліла ў нафтабазу ля Васількова.
Фота карэспандэнта Радыё Свабода Мар’яна Кушніра, якое ён зрабіў у нядзелю раніцай пад Васільковым, дзе ідуць баі з расейскімі вайскоўцамі.
Пэнтагон: Пуцін выкарыстаў супраць Украіны больш за палову назапашаных сіл
Расея кінула ў бой больш за палову сіл, сабраных перад уварваньнем ва Ўкраіну. Пра гэта паведаміў высокапастаўлены чыноўнік Мінабароны ЗША. Ён правёў брыфінг для журналістаў.
«Цяпер мы б ацанілі, што больш за 50% расейскіх сіл, якія Пуцін выставіў супраць Украіны, на нашу думку, былі задзейнічаныя ўнутры Ўкраіны», – сказаў ён.
Прадстаўнік Пэнтагону заявіў, што паводоле ацэнак ЗША, украінскія войскі актыўны супраціўляюцца, што стала нечаканасьцю для расейскага боку.
«Мы па-ранейшаму лічым, грунтуючыся на тым, што мы назіралі, што гэты супраціў большы, чым чакалі расейцы, і ў нас ёсьць прыкметы таго, што расейцы ўсё больш хвалююцца з прычыны адсутнасьці імпульсу за апошнія 24 гадзіны, асабліва ў паўночных частках Украіны», – сказаў ён.
Паводле Пэнтагону, украінскія сыстэмы супрацьпаветнанай абароны застаюцца дзеяздольнымі і актыўна выкарыстоўваюцца.
Кіеў умацоўвае абарону
Украінскія Ўзброеныя сілы працягваюць нарошчваць групоўку для абароны Кіева з паўночнага і паўночна-заходняга напрамку, паведаміла афіцыйны прадстаўнік Мінабароны Ўкраіны Ганна Маляр.
Па ўсёй Украіне працягваецца выкананьне плянавых захадаў па мабілізацыі, у тым ліку фармаваньне тэрытарыяльнай абароны і карпусы рэзэрву, напісала яна.
Рада Бясьпекі ААН зьбярэцца на 4-е паседжаньне з прычыны расейскага нападу на Ўкраіне
Сустрэча заплянаваная на 23:00 па менскім часе ў Нью-Ёрку, падчас яе Рада вырашыць, ці перадаваць рэзалюцыю супраць уварваньня Расеі ва Ўкраіну на разгляд Генасамблеі.
Ціханоўская заклікала пратэставаць супраць вайны каля выбарчых участкаў
У відэазвароце Сьтвятлана Ціханоўская заклікала 27 лютага а 14-й гадзіне прыходзіць да выбарчых участкаў у Беларусі і актыўна выказваць пратэст супраць нападу Расеі на Ўкраіну.
Расейскія войскі знаходзяцца на закрытай ЧАЭС
На спадарожнікавым здымку з накладзенай графікай відаць машыны расейскіх акупацыйных войск побач з Чарнобыльскай АЭС. Украіна, 25 лютага 2022 году.
Ва Ўкраіне паведамілі, што зьбілі ракету, выпушчаную з тэрыторыі Беларусі
Паветраныя сілы Ўзброеных сіл Украіны некалькі хвілінаў таму зьбілі крылатую ракету, выпушчаную па Кіеве з тэрыторыі Беларусі самалётам ТУ-22, паведаміў галоўнакамандуючы УС Украіны Валеры Залужны.
Расейская дэлегацыя прыбыла ў Беларусь
Яна прыбыла на перамовы з украінцамі, паведаміў прэс-сакратар Пуціна Пяскоў, якога цытуе ТАСС. Дэлегацыя Расеі гатовая пачаць перамовы з Украінай у Гомлі, дадаў ён. Пры гэтым з украінскага боку не было ніякіх заяў пра якія-небудзь перамовы з агрэсарам.
Рэакцыя Ўкраіны на прыбыцьцё расейскай дэлегацыі ў Гомель
Дарадца міністра ўнутраных спраў Украіны Антон Герашчанка адкінуў усе магчымыя перамовы з расейцамі да поўнай капітуляцыі апошніх. Тэрытарыяльную цэласнасьць Украіны неабходна аднавіць і выплаціць рэпарацыі за разбураныя эканоміку і інфраструктуру. Іначай перамоваў ня будзе.
Украіна стварыла Інтэрнацыянальны легіён тэрытарыяльнай абароны
Прэзідэнт Украіны Уладзімір Зяленскі заклікаў замежных грамадзян, якія жадаюць «далучыцца да абароны бясьпекі ў Эўропе і сьвеце», уступаць у Інтэрнацыянальны легіён тэрытарыяльнай абароны Ўкраіны.
Зяленскі зьвярнуўся да беларусаў. ВІДЭА
«На вайне, якая ідзе зараз, вы з намі не на адным баку. На жаль». І пажадаў ім зрабіць «правільны выбар» на рэфэрэндуме па зьмяненьні Канстытуцыі:
«Шчыра жадаю Беларусі зноў стаць такой жа добрай і бясьпечнай, якой яе яшчэ нядаўна ўсё бачылі. Зрабіце правільны выбар – гэта галоўны выбар вашага жыцьця».
Пашкоджаны абстрэламі жылы будынак у Харкаве
У Чарнігаўскай вобласці паліцыянты разам зь мясцовымі жыхарамі спынілі калёну расейскіх танкаў
Зяленскі заявіў, што Кіеў згодны на перамовы з Расеяй, але ня ў Менску
«Ня Менск. Варшава, Братыслава, Будапэшт, Стамбул, Баку — гэтыя гарады мы прапанавалі Расеі для вядзеньня перамоваў. Ды і любы іншы горад нам падыходзіць — у краіне, з тэрыторыі якой не ляцяць ракеты ва Ўкраіну», заявіў прэзыдэнт Украіны.
«Ехаў на вучэньні ў Беларусь. Як апынуліся ва Ўкраіне, не разумею». Пра палонных вайскоўцаў з Сібіру паведамляюць іхныя сем’і
Украінскае выданьне УНІАН 26 лютага апублікавала відэа з палонным 19-гадовым салдатам Паўлам Краўчанкам зь вёскі Новачаромхава Іркуцкай вобласьці. Рэдакцыі Сібір.Рэаліі расейскай службы Радыё Свабода ўдалося пагаварыць з роднымі яшчэ аднаго вайскоўца з 11 дэсантна-штурмавой брыгады Улан-Удэ А. — яго сястра мяркуе, што ён трапіў у палон, як яшчэ двое вайскоўцаў з гэтай жа брыгады, Вадзім Міхоеў і Натан Касаткін.
Пазьней у рэдакцыю зьвярнулася сястра аднаго з вайскоўцаў 11 дэсантна-штурмавой брыгады. Яна паведаміла, што яе брат з учарашняга дня не выходзіць на сувязь, яна баіцца, што ён таксама трапіў у палон. «Ён ехаў на вучэньні ў Беларусь. Як яны апынуліся ва Ўкраіне, я не разумею», — паведаміла жыхарка Улан-Удэ.
Разбурэньні ад абстрэлаў у Мікалаеве
Зьяўляюцца новыя відэа і фота разбурэньняў жылых дамоў у выніку расейскай узброенай агрээсіі ў Кіеве, Харкаве, Херсоне, а цяпер і Мікалаеве.
Расейцы ў Харкаве кінулі сваю тэхніку
Уварваньне ў Харкаў расейскага спэцназу скончылася раззбраеньнем і згарэлымі машынамі. Украінскія вайскоўцы разьбіраюць, што з сабою прыезлі расейскія салдаты.
Пратэст ля расейскай амбасады ў Мэксыцы
Расейскія банкі, якія трапілі пад санкцыі, адключаюць ад SWIFT
ЗША, Канада і ключавыя краіны Эўразьвязу, уключаючы Нямеччыну, Францыю і Італію, узгаднілі выключэньне з сыстэмы міжбанкаўскіх плацяжоў SWIFT расейскіх банкаў, якія трапілі пад санкцыі. Пра гэта гаворыцца ў заяве на сайце Белага дому.
Дакладны сьпіс банкаў, якія падпалі пад абмежаваньне, не прыводзіцца. Санкцыі цяпер уведзеныя, у прыватнасьці, супраць «Альфа-Банка», ВЭБ, ВТБ, «Промсвязьбанка», «Открытия», Банка «Россия», «Россельхозбанка», МКБ, «Совкомбанка» і некалькіх крэдытных арганізацый, якія працуюць у анэксаваным Крыме.
Як вынікае з паведамленьня Белага дому, адключэньне расейскіх банкаў ад SWIFT – не адзінае ўзмацненьне жорсткасьці санкцый. Бакі дамовіліся ўскладніць атрыманьне грамадзянства ў заходніх краінах у абмен на інвэстыцыі для расейскіх бізнэсмэнаў, зьвязаных з урадам. Бакі дамовіліся ўскладніць магчымасьці для расейскага Цэнтрабанка супрацьдзейнічаць санкцыям.