Група расейскіх незалежных блогераў Conflict Intelligence Team (CIT), якая займаецца расьсьледаваньнем абставінаў збройных канфліктаў па адкрытых крыніцах, прааналізавала матэрыял журналістаў France Télévisions, што выйшаў напярэдадні. Прадстаўнікі FT пабывалі ў населеных пунктах Клінцы і Клімава Бранскай вобласьці (45 і 13 кілямэтраў ад мяжы з Украінай адпаведна).
Уладкаваньне палявых лягераў і стаянак у гэтым раёне пачалося яшчэ летась, аднак у апошнія тыдні актыўнасьць у Клінцах і Клімаве аднавілася.
У рэпартажы францускай тэлевізіі спэцыялісты CIT заўважылі некалькі грузавікоў з дзяржаўнымі нумарамі з двухзначнымі кодамі 76 і 87. На чорных вайсковых нумарах гэтыя коды адпавядаюць Цэнтральнай вайсковай акрузе (ЦВА).
Стаянкі тэхнікі ў Ельнінскім лягеры практычна апусьцелі, у той час як у намётавым мястэчку актыўнасьць, наадварот, павысілася. Акрамя таго, раней адзначаўся рух аўтакалёнаў паміж Смаленскай і Бранскай абласьцямі. Акрамя таго, ёсьць і сьвежыя сьведчаньні перакіданьня тэхнікі зь Ельні па чыгунцы.
