Паводле Зяленскага, дакумэнт прадугледжвае:
- павелічэньне матэрыяльнага забесьпячэньня ўсіх вайскоўцаў да ўзроўню, не ніжэйшага за тры мінімальныя заработныя платы (мінімальная заработная плата з пачатку 2022 году складае 6,5 тысячы грыўняў, $225);
- пераход Украіны на «прынцыпы прафэсійнай арміі»;
- павелічэньне тэрміну кантрактаў;
- распрацоўку канцэпцыі жытла для вайскоўцаў, вэтэранаў, іхных сямейнікаў;
- сыстэму кар’ернага росту афіцэраў;
- павелічэньне ў наступныя тры гады колькасьці Узброеных сіл на 100 тысяч чалавек прафэсійнай арміі, стварэньне дадаткова 20 брыгад Узброеных сіл.
«Гэты ўказ — пачатак пераходу Ўкраіны да прафэсійнага войска. Гэты ўказ не таму, што хутка вайна, я гэта ўсім кажу. Гэты ўказ за мір ва Ўкраіне ў найбліжэйшы час і ў будучыні. Я рады падпісаць гэты ўказ у вашай прысутнасьці», — пракамэнтаваў свой крок Зяленскі.
- Згодна з украінскім заканадаўствам, колькасны склад і правіла фармаваньня ўкраінскай арміі вызначаюць адпаведныя законы, якія ўхваляе Вярхоўная Рада Ўкраіны. У прыватнасьці, колькасьць войска зацьвярджаецца кожны год адмысловым законам на падставе прапаноў кіраўніка дзяржавы.
- У канцы 2021 году парлямэнт Украіны ўхваліў рашэньне аб павелічэньні ў 2022 годзе колькасьці арміі на 11 тысяч — да 261 тысячы асобаў, у тым ліку 215 тысяч кантрактнікаў.
- Сёлета Украіна пачала ствараць сілы тэрытарыяльнай абароны (да 10 тысяч), на адну тысячу павялічаць колькасьць Сіл спэцыяльных апэрацый.
