Дзяржаўны доўг Беларусі на 1 студзеня склаў 58,3 млрд рублёў і павялічыўся ў параўнаньні з пачаткам 2021 году на 0,5 млрд рублёў, ці на 0,9%, паведаміла Міністэрства фінансаў.
Замежны дзярждоўг па стане на 1 студзеня склаў 18,2 млрд даляраў ЗША, ён з пачатку году зьменшыўся на 0,4 млрд даляраў (з улікам курсавых розьніц), або на 1,9%.
Летась прыцягнулі замежныя дзяржаўныя пазыкі на суму, эквівалентную 1 млрд 273,1 млн даляраў, пагашэньне замежнага дзяржаўнага доўгу склала 1 млрд 609 млн даляраў ЗША.
Унутраная дзяржаўная пазыка па стане на 1 студзеня — на ўзроўні 11,8 млрд рублёў, яна павялічылася з пачатку году на 2 млрд рублёў (з улікам курсавых розьніц), або на 19,9%.
У 2021 годзе разьмешчана ўнутраных валютных і рублёвых дзяржаўных аблігацый для юрыдычных і фізычных асоб на суму, эквівалентную 1 млрд. 237,8 млн даляраў і 191 млн рублёў. Пагашана валютных і рублёвых дзяржаўных аблігацый для юрыдычных і фізычных асоб на суму, эквівалентную 333,1 млн даляраў і 145 млн рублёў.
Як паведамлялася, на пагашэньне дзяржаўнага доўгу сёлета дзяржава заплянавала выдаткаваць 6 млрд 936,3 млн рублёў, на яго абслугоўваньне — 3 млрд 522,4 млн рублёў.
