25 студзеня крымінальна-выканаўчая інспэкцыя накіравала хадайніцтва ў Люблінскі раённы суд Масквы з патрабаваньнем замяніць Алегу Навальнаму ўмоўны тэрмін па «санітарнай справе» на рэальны.
Згодна з інфармацыяй на сайце суда, хадайніцтва аб адмене рашэньня зарэгістравана 24 студзеня. У якасьці нагоды для яго ўказана невыкананьне асуджаным ускладзеных абавязкаў, ухіленьне ад кампэнсацыі шкоды або ўчыненьне новага злачынства.
Брат палітыка Аляксея Навальнага Алег у жніўні 2021 года атрымаў год умоўна па «санітарнай справе». Яно было распачата ў студзені 2021 года. Па вэрсіі сьледзтва, абвінавачаныя заклікалі выйсьці на акцыю ў падтрымку Аляксея Навальнага і правакавалі людзей на парушэньне санітарна-эпідэміялягічных норм.
У жніўні мінулага года суд прызначыў Алегу Навальнаму год умоўнага тэрміну, яго прызналі вінаватым у падбухторваньні да парушэньня санітарных нормаў.
«Санітарная справа» была распачата пасьля пратэстных мітынгаў, якія прайшлі ў студзені 2021 года, у падтрымку Аляксея Навальнага. Па вэрсіі сьледзтва, паплечнікі палітыка стварылі небясьпеку распаўсюджваньня каранавіруса, заклікаўшы людзей выйсьці на акцыі пратэсту.
