Старшыня «Вясны» прастыў, чытае Караткевіча і Мележа
Старшыня і заснавальнік праваабарончага цэнтра «Вясна» Алесь Бяляцкі даслаў ліст з «Валадаркі», дзе сядзіць амаль паўгода. Ён расказаў, што крыху прастудзіўся, але спадзяецца празь некалькі дзён ачуняць, піша «Вясна».
«Час спыніўся. Я спакойна да гэтага стаўлюся, бо не заўсёды навіны і зьмены вядуць да добрага. Але цяжка ў гэтым выпадку пісаць зьмястоўныя лісты», – паведаміў Бяляцкі.
Ён узяў у бібліятэцы трэція тамы Караткевіча і Мележа.
«Але праблема ў тым, што стамляюцца вочы. Улічваючы, што дні кароткія, я чытаю небагата. Максымум 1,5 гадзіны ў дзень», – піша вязень.
Напісаць яму ліст можна па адрасе: 220030 СІЗА №1, Менск, вуліца Валадарскага, 2, Алесю Віктаравічу Бяляцкаму.
Лідэра АГП Мікалая Казлова накіравалі ў Баранавічы адбываць арышт
Мікалай Казлоў пачаў адбываць трохмесячны арышт у горадзе Баранавічах, піша «Вясна».
Летась у жніўні Казлова прызналі вінаватым у выдаваньні дадзеных у крымінальнай справе супраць Каардынацыйнай рады (ч. 1 арт. 407 Крымінальнага кодэксу). Суд праходзіў у закрытым рэжыме.
Раней Казлоў некалькі разоў адмаўляўся даваць падпіску аб невыдаваньні пасьля допытаў у сьледчым камітэце. За гэта яго ўжо прыцягвалі да адміністрацыйнай адказнасьці.
Напісаць Мікалаю Казлову можна па адрасе: 225320, СІЗА №6, горад Баранавічы, вуліца Берасьцейская, 258В, Казлову Мікалаю Георгіевічу.
Журналіст Івашын выйшаў з карцару
Журналіст Дзяніс Івашын у першы дзень году выйшаў з карцару, дзе сустрэў Раство і Новы год. Сваякі яму здолелі перадаць сьвяточную перадачу 3 студзеня, паведаміла жонка вязьня Вольга Івашына.
«Пачуваецца бадзёра, упэўнена. Напісаў скаргу на ўдзельнікаў катаваньняў супраць яго», — напісала Вольга Івашына ў Facebook.
Напісаць яму ліст можна па адрасе: 230023, турма №1, Горадня, вуліца Кірава, 1, Івашыну Дзянісу Яўгенавічу.
Філёзафу Мацкевічу працягнулі тэрмін утрыманьня пад вартай
Філёзафа і мэтадоляга, грамадзкага дзеяча Ўладзімера Мацкевіча пакінулі за кратамі яшчэ на месяц — да 4 лютага, паведамляецца на старонцы Фэйсбуку @philosopher.in.prison, прысьвечанай Уладзімеру Мацкевічу, якую вядуць ягоныя паплечнікі.
Мацкевіча затрымалі 4 жніўня. У той жа дзень супрацоўнікі Камітэту дзяржбясьпекі правялі ў яго ператрусы праз падазрэньне ў арганізацыі або ўдзеле ў дзеяньнях, якія парушылі грамадзкі парадак (артыкул 342 КК). Пазьней стала вядома, што артыкулы зьняволенага філёзафа правяраюць «на прыкметы распальваньня варожасьці». Праваабаронцы мяркуюць, што абвінавачаньне хочуць пашырыць ці перакваліфікаваць.
Напісаць яму ліст можна па адрасе: 220030 СІЗА №1, Менск, вуліца Валадарскага, 2, Мацкевічу Ўладзімеру Ўладзімеравічу.
