«Мы акажам і гуманітарную дапамогу, і дапамогу ў галіне аховы здароўя (...) Калі такая дапамога ім патрэбная, яна ім аказваецца неадкладна», — сказаў Дуда.
«Я хачу гэта ўсяляк падкрэсьліць, бо такіх выпадкаў, калі польскія службы ратавалі мігрантаў, ці то ў балоцістай мясцовасьці, дзе яны апынуліся, ці ў лесе, было ўжо шмат, і ўсім гэтым людзям, калі на іх натыкаліся нашы службоўцы, дапамога была аказаная ў кожным выпадку», — дадаў ён.
На прэсавай канфэрэнцыі Дуду спыталі і пра сытуацыю на польска-беларускай мяжы, а таксама пра дэталі размовы, якую ён меў некалькі дзён таму з генэральным сакратаром Паўночнаатлянтычнага альянсу Енсам Столтэнбэргам.
Прэзыдэнт Рэспублікі Польшча выказаў удзячнасьць і задавальненьне, што Столтэнберг «так рашуча выклаў сваю пазыцыю» наконт сытуацыі на польска-беларускай мяжы.
Дуда таксама паведаміў, што падчас гэтай размовы ён акрэсьліў «усе пытаньні, зьвязаныя з магчымымі ваеннымі пагрозамі», якія могуць узьнікнуць.
«Я кажу „магчымымі“, бо мы іх яшчэ не заўважылі», — дадаў Анджэй Дуда.
Апрача таго, як ён паведаміў, ён папрасіў кіраўніка NATO «зьвярнуць асаблівую ўвагу» на тэрыторыю польска-беларускага памежжа.
Енс Столтэнбэрг пасьля размовы з Анджэем Дудам напісаў у Твітэры: «Выкарыстаньне мігрантаў Беларусьсю ў якасьці гібрыднай тактыкі непрымальнае. NATO салідарнае з Польшчай і ўсімі нашымі саюзьнікамі ў рэгіёне».
Прэзыдэнт Польшчы нагадаў, што ў апошнія дні ён таксама размаўляў з прэзыдэнтамі Францыі — Эмануэлем Макронам і Літвы — Гітанасам Наўседам. «У нас аднолькавыя назіраньні, аднолькавыя веды і аднолькавая думка наконт гэтага: гэта гібрыдная атака беларускага рэжыму на мяжу Эўразьвязу і Паўночнаатлянтычнага альянсу», — адзначыў Дуда.
«Мы спадзяёмся, што дзякуючы палітычнай падтрымцы эўрапейскай супольнасьці і Паўночнаатлянтычнага альянсу гібрыдная атака на польскую мяжу хутка будзе завершаная», — заявіў прэзыдэнт Польшчы Анджэй Дуда пасьля сустрэчы з прэзыдэнтам Паўночнай Македоніі Стэва Пэндароўскім.
«Гэта факт, што беларускі рэжым распачаў гібрыдную атаку на мяжу ЭЗ і NATO. Гэта тры краіны як ЭЗ, так і Паўночнаатлянтычнага альянсу: Польшча, Літва і Латвія. Сёньня наймацней атакуецца польская мяжа», — сказаў Дуда.
«Таму мы ўсімі сіламі абараняем як ЭЗ, так і тэрыторыю NATO ад нелегальнай міграцыі», — дадаў ён. Ён ацаніў, што гэта складаная і непрыемная сытуацыя, бо сілы рэжыму штурхаюць мігрантаў да польскай мяжы.
