Кубінскія ўлады забаранілі «Грамадзянскі марш за перамены» і папярэдзілі апазыцыю, што яны не пацярпяць таго, што яны назвалі «контрарэвалюцыйнымі» і «тэрарыстычнымі» дзеяньнямі.
Урад заявіў, што лічыць пратэст часткай інтэрвэнцыянісцкага пляну ЗША. Амэрыканскія афіцыйныя асобы адхілілі гэтыя абвінавачаньні.
Перад заплянаваным на панядзелак маршам паліцыянты ў цывільным акружылі дамы актывістаў і незалежных журналістаў, каб ня даць ім выйсьці з дому.
Інфармагенцтва AFP паведаміла, што за некалькі гадзін да заплянаванай акцыі паліцыя арыштавала ключавых дысыдэнтаў, уключаючы апазыцыйнага дзеяча Мануэля Куэсту Маруа, лідэра праваабарончага руху «Жанчыны ў белым» Бэрту Солер і яе мужа Анхеля Мою.
Дарадца Белага дома ў нацыянальнай бясьпецы Джэйк Сэліван заявіў, што сваімі дзеяньнямі «кубінскі рэжым выказаў непавагу да грамадзянскіх і палітычных правоў, пералічаных ва Ўсеагульнай дэклярацыі правоў чалавека і міжнародных дамовах аб правах чалавека, ратыфікаваных Кубай, уключаючы права на мірныя сходы і асацыяцыі, права на свабоду думак і выказваньня, а таксама свабоду ад адвольных арыштаў, затрыманьняў або выгнаньняў».
«Мы заклікаем кубінскі рэжым устрымацца ад гвалту ў дачыненьні да мірных дэманстрантаў і неадкладна вызваліць несправядліва затрыманых. Мы заклікаем міжнародную супольнасьць выказаць падтрымку кубінскаму народу», — дадаў Сэліван.
