У посьце гаворыцца, што на днях Навальнага выклікалі ў калёніі на камісію, дзе паведамілі аб прынятых у дачыненьні да яго рашэньнях.
«Опэрупаўнаважаны такі і такі накіраваў рапарт пра тое, што асуджаны Навальны вызнае экстрэмісцкую і тэрарыстычную ідэалёгію», — цытуе палітык пасяджэньне камісіі.
Паводле яго слоў, ён зьняў з адзеньня біркі з чырвонай паласой і прышыў новыя — зь зялёнай, якая пазначае зьняволеных, схільных да экстрэмізму. Па словах Навальнага, так у калёніях пазначаюць галоўным чынам «мусульман, нацыяналістаў і футбольных фанатаў».
У жніўні расейскія ўлады ўнесьлі заснаваныя Навальным Фонд барацьбы з карупцыяй і Фонд абароны правоў грамадзян у пералік экстрэмісцкіх арганізацый. Пракуратура абгрунтавала гэтае рашэньне тым, што «пад прыкрыцьцём лібэральных лёзунгаў гэтыя арганізацыі займаюцца фармаваньнем умоў для дэстабілізацыі сацыяльнай і грамадзка-палітычнай сытуацыі». Пазьней СК распачаў крымінальную справу аб стварэньні і кіраваньні экстрэмісцкай супольнасьцю ў дачыненьні да Навальнага і яго паплечнікаў Леаніда Волкава і Івана Жданава.
«Навіны гэтыя добрыя. „Экстрэмісцкі“ і „тэрарыстычны“ прафулікі не такія стамляльныя, як „уцякач“», — напісаў Навальны ў сувязі з рашэньнем кіраўніцтва калёніі.
Ён дадаў, што экстрэмісцкі і тэрарыстычны ўлікі не патрабуюць пастаянных праверак.
«Асьцерагаўся, што запатрабуюць, каб я цалаваў партрэты Пуціна і вучыў на памяць цытаты Мядзьведзева, але і гэтага ня трэба. Проста над маімі нарамі цяпер вісіць шыльда, што я тэрарыст», — напісаў палітык у канцы поста.
