Лукашэнка сказаў 1 кастрычніка, што 28 верасьня сілавікі не праводзілі якой-колечы сурʼёзнай спэцапэрацыі.
«Хлопцы адпрацоўвалі вялізны раён паводле апэратыўнай інфармацыі, атрыманай раней, на прадмет прыналежнасьці асобных людзей да спробы тэрарызму».
Да 14-й гадзіны, калі прыйшлі на адрас Зельцара, затрымалі нямала людзей.
«Яны цяпер даюць паказаньні. Мы зараз іх усіх вам пакажам. Яны бірку напісалі — „Рабочы рух“. Вось гэтых „рухавікоў“ мы пачалі паказваць і будзем усіх іх вам выкладваць, каб вы зразумелі, што гэта за „рабочы рух“», — сказаў Лукашэнка.
«Людзі заходзяць, каб мярзотнікам дапамагчы, якія пазванілі з гэтай кватэры»
Раней ініцыятыва ByPol паведамляла, што з кватэры Зельцара двойчы званілі на 102 і казалі, што невядомыя ломяцца ў дзьверы. 29 верасьня Рыгор Азаронак на СТВ інтэрпрэтаваў гэтыя факты такім чынам, што Зельцар з жонкай самі выклікалі на сябе міліцыю і чакалі яе са стрэльбай і запушчанай на запіс відэакамэрай. Цяпер упершыню агучаную Азаронкам вэрсію разьвіў Лукашэнка.
Ён сказаў, што падчас працы групы сілавікоў тыя атрымалі інфармацыю зь дзяжурнай часткі міліцыі, «маўляў, там дзе вы працуеце, пазванілі з кватэры, просяць дапамогі, нешта там здарылася».
«Цяпер мы можам меркаваць, чаму раздаўся званок. Ну, хлопцы паглядзелі, што і гэты адрас ёсьць, просяць дапамогі, нешта там здарылася. І яны як добрыя славяне, добрыя беларусы рынуліся туды, да гэтай кватэры. Грукаюць — ніхто не адчыняе. Раздаецца другі званок пра дапамогу ў гэты ж аддзел міліцыі», — сказаў Лукашэнка.
«Ускрываюцца дзьверы, людзі заходзяць, каб дапамагчы, мярзотнікам дапамагчы, якія пазванілі з гэтай кватэры».
«А тое, што яны ў гэты час рабілі, вы таксама бачылі».
«Яны трансьлявалі туды, у Польшчу, Амэрыку, гэтыя кадры»
«Яны рыхтаваліся да здымкі. Ніхто не зьбіраўся там гінуць. Трэба было паказаць здымку, і ў рэальным рэжыме часу (гэта таксама ўжо вядома) яны трансьлявалі туды, у Польшчу, Амэрыку, гэтыя кадры», — заявіў Лукашэнка.
«Самы сапраўдны ўдзельнік мяцяжу»
Лукашэнка таксама сказаў, што кватэра належала брату Марыі Ўсьпенскай, жонкі Андрэя Зельцара.
«І сёньня абсалютна дакладна нам вядома, што гэта ня проста актыўны ўдзельнік пратэставага, як мы мякка кажам, а самы сапраўдны ўдзельнік мяцяжу, у тым ліку і гэты айцішнік», — заявіў Лукашэнка.
«Паміраючы, з двух стрэлаў Дзьмітры расстраляў забойцу»
Лукашэнка таксама заявіў, што афіцэр КДБ Дзьмітры Федасюк забіў Андрэя Зельцара ўжо пасьля сьмяротнага раненьня.
«Дзіма апярэдзіў іншых, прыкрываючы групу, забег у кватэру першым. „Зброю на падлогу!“ Замест гэтага яму страляе ў сэрца. Паміраючы, з двух стрэлаў Дзьмітры расстраляў забойцу».
«Хлопцы не хацелі лішні раз, як яны кажуць, сьвяціцца, баронячы людзей»
Лукашэнка таксама патлумачыў, чаму сілавікі былі бяз формы і бронекамізэлек.
Паводле яго, такім чынам яны не хацелі хваляваць людзей, якія дрэнна рэагуюць на зьяўленьне на вуліцах супрацоўнікаў у поўным рыштунку. Таму праверкі, падчас якіх яны адпрацоўвалі апэратыўную інфармацыю, вяліся ў цывільным адзеньні.
«Што на гэта сказаць? Цяжка іх за гэта асудзіць. Проста хлопцы не хацелі лішні раз, як яны кажуць, сьвяціцца, баронячы людзей», — сказаў Лукашэнка.
«Ужо некалькі соцень сядзяць»
Лукашэнка заявіў, што спэцслужбы выявілі ячэйкі «Рабочага руху» з 2–12 чалавек.
«Гэта звычайныя „ігілаўскія“ ячэйкі эўрапейскага разьліву на тэрыторыі Беларусі», — заявіў ён і дадаў, што КДБ выявіў «прамыя кантакты з спэцслужбамі ЗША і перш за ўсё ФБР».
Ён сказаў, што і надалей сілавікі будуць выбарачна «адпрацоўваць розных людзей, розныя арганізацыі і розныя варыянты».
«У нас хопіць розуму, каб кропкава разабрацца з кожным нягоднікам», — заявіў Лукашэнка.
«Ужо некалькі соцень сядзяць. Акрэсьціна свабоднае, цяпер там знаходзяцца. Усё расказваюць».
«І Сергеенка правільна сказаў: ня трэба прыбіраць з гэтых чатаў і іншае — позна. Усе акаўнты ў нас на руках. Мы бачым, хто чаго варты.
І калі мярзотнікі кшталту цапкалаў і іншых думаюць, што мы іх не дастанем за мяжой, яны памыляюцца. Мы не даруем гібель гэтага хлопца», — заявіў Лукашэнка.
Перастрэлка Андрэя Зельцара з групай КДБ. Што вядома
28 верасьня каля другой гадзіны дня супрацоўнікі КДБ у цывільнай вопратцы ўзламалі дзьверы і ўварваліся ў кватэру, дзе быў Андрэй Зельцар і ягоная жонка Марыя Ўсьпенская.
Паводле афіцыйнай вэрсіі, Зельцар двойчы стрэліў і сьмяротна параніў аднаго з групы КДБ. Супрацоўнікі КДБ застрэлілі яго ў адказ.
Жонку, якая здымала здарэньне на тэлефон, затрымалі за дапамогу ў забойстве.
Андрэю Зельцару быў 31 год.
У 2008 годзе ён скончыў тэхнікум бізнэсу і права. З 2016-га працаваў у Epam кіраўніком групы (team lead).
Захапляўся фэхтаваньнем, бегам па прыродным рэльефе, трыятлёнам.
Вядома, што ён плаціў дзяржаўнае мыта на права паляваньня. Гэта можа значыць, што стрэльбу ён меў законна, і пра гэта было вядома адпаведным службам. Мяркуючы па фота ў інстаграме Зельцара, марка стрэльбы — «ИЖ-27».
17 жніўня 2020 году ў сваім інстаграме ён заклікаў да ўсеагульнай забастоўкі і «ісьці да канца».
Ягоная жонка Марыя Ўсьпенская працавала ў сетцы крамаў побытавай хіміі, ёй 40 гадоў. У іх ёсьць сын, які нарадзіўся ў 2012 годзе.
Пра загінулага супрацоўніка КДБ спачатку афіцыйна паведамілі толькі пазыўны «Нірвана». У дзень разьвітаньня зь ім, 1 верасьня, з паведамленьня БелТА стала вядома, што яго імя Дзьмітры Федасюк, ён афіцэр групы «А» КДБ. Раней гэтыя зьвесткі неафіцыйна паведаміў ByPol. Федасюку быў 31 год. У яго засталіся жонка і малое дзіцё.
Праўладныя СМІ апублікавалі відэа зь месца здарэньня каля восьмай гадзіны вечара. Яно было змантаванае з запісаў дзьвюх камэр — з боку сілавікоў і з боку Зельцара. Сілавікі патлумачылі запіс з пакою Зельцара ягоным жаданьнем «хайпануць».
Некаторыя карыстальнікі сацыяльных сетак палічылі відэа пастаноўкай. У іншых на падставе паказаных кадраў узьніклі сумненьні ў афіцыйнай вэрсіі здарэньня. Выказваліся розныя меркаваньні: і што байца КДБ маглі сьмяротна параніць свае ж, і што Зельцар страляў траўматычнымі, а не паляўнічымі, кулямі (якія, аднак, зблізку таксама маглі нанесьці сьмяротнае раненьне).
