Апарат Упаўнаважанага па справах рэлігій і нацыянальнасьцяў адрэагаваў на публікацыю ў газэце «Мінская праўда», дзе зьмяшчалася карыкатура на каталіцкіх сьвятароў, паведаміла Курыя Віцебскай дыяцэзіі.
Пра гэта гаворыцца ў лісьце ад 9 верасьня на імя старшыні Канфэрэнцыі каталіцкіх біскупаў Алега Буткевіча.
У лісьце ўпаўнаважаны Аляксандар Румак адзначае, што
- публікацыя не адлюстроўвае афіцыйную пазыцыю дзяржавы ў адносінах да Рыма-каталіцкага Касьцёла ў Беларусі,
- публікацыя не спрыяе падтрыманьню міжканфэсійнага міру і згоды ў краіне,
- атаясамленьне аўтарам артыкула асабістай ацэнкі дзейнасьці асобных каталіцкіх сьвятароў з усім Рыма-каталіцкім Касьцёлам у Беларусі ёсьць непрымальным,
- Міністэрства інфармацыі пісьмова апавясьціла «Менскую праўду» пра недапушчальнасьць падобнага роду публікацый.
9 верасьня міністар замежных спраў Уладзімер Макей сустрэўся з апостальскім нунцыем у Беларусі арцыбіскупам Антэ Ёзічам
Уладзімер Макей заявіў пра:
- нацэленасьць на канструктыўнае супрацоўніцтва з Ватыканам,
- недапушчальнасьць распальваньня рэлігійнай нецярпімасьці,
- важнасьць захаваньня ў краіне этнаканфэсійнай згоды ў цэлым.
«У гэтым кантэксьце ня варта надаваць ніякага значэньня асобным, выключна субʼектыўным спробам намаляваць сытуацыю інакш», — гаворыцца ў паведамленьні МЗС.
У камэнтары для Catholic.by па выніках сустрэчы з міністрам Макеем Апостальскі нунцый Антэ Ёзіч адзначыў, што ўлады «не падтрымліваюць ніякіх дзеяньняў, скіраваных на распальваньне варожасьці ў дачыненьні да прадстаўнікоў той ці іншай рэлігійнай супольнасьці».
7 верасьня на першай старонцы сьвежага нумару «Мінская праўда» апублікавала карыкатуру Антона Астроўскага, на якой выява каталіцкіх сьвятароў у характэрным адзеньні, свастыка, бел-чырвона-белы сьцяг і словы беларускага хрысьціянскага гімну «Магутны Божа» на фоне скажонай рэплікі абраза Росіцкіх пакутнікаў — сьвятароў, якія падчас ІІ сусьветнай вайны разам са сваімі вернікамі мужна прынялі сьмерць ад рук нацысцкіх карнікаў. Рысунак падпісаны на расейскай мове: «Мутация веры. Кресты бывают разные...».
У нумары таксама зьмясьцілі артыкул Льва Крыштаповіча з абвінавачваньнем арцыбіскупа Тадэвуша Кандрусевіча і біскупа Юрыя Касабуцкага ў антыдзяржаўнай дзейнасьці.
Беларуская Каталіцкая царква асудзіла публікацыю і расцаніла яе як «распальваньне варожасьці ў беларускім грамадзтве да Рымска-каталіцкага Касьцёлу ў Беларусі, асабліва да яго ярархаў і прэзьбітэраў.
«Гэтая публікацыя наносіць вялікую абразу рэлігійным пачуцьцям вернікаў Каталіцкай царквы. Публікацыя нясе маральную шкоду ўсім хрысьціянам розных канфэсій, таксама ўскосна абвінавачвае ўсё каталіцкае духавенства ў меркаванай прыхільнасьці да фашызму і нацызму, што зьяўляецца сьвядомым і зламысным скажэньнем праўды, паклёпам і абразай», — гаварылася ў рэакцыі Касьцёлу.
Генэральны вікарый Менска-Магілёўскай архідыяцэзіі біскуп Юры Касабуцкі ад сябе заявіў, што ня зьменіць свайго погляду, нягледзячы на пагрозы.
«Я заўсёды выступаў супраць гвалту, насільля, катаваньняў, несправядлівасьці, хлусьні, рэпрэсій. Я не зьмяню гэтага свайго погляду, нягледзячы на пагрозы, шантаж і таму падобныя рэчы, зь якімі мне прыходзіцца сутыкацца. Таксама і падобныя артыкулы ня здольныя паўплываць на мой сьветапогляд, які базуецца на Эвангельлі.
Бел-чырвона-белы сьцяг — гэта ў хрысьціянскай сымболіцы знак і сымбаль уваскрослага Хрыста, і гэта НЕ залежыць ад ідэолягаў, якія сёньня шукаюць „аргумэнтаў“ супраць...
Гімн „Магутны Божа“ даўно стаў часткай нашай літургіі, таму што гэта малітва за нашу краіну і наш народ, а калі гэта не падабаецца сучасным ідэолягам, гэта НЕ праблема Касьцёлу... Мы сёньня не ўжываем гэтай малітвы толькі таму, каб гэтым не раздражняць нікога», — напісаў у фэйсбуку Юры Касабуцкі.
