Апошні амэрыканскі вайсковец пакінуў Афганістан, і апэрацыя эвакуацыі завершаная. Пра гэта заявіў журналістам у Пэнтагоне генэрал Кенэт Маккензі, кіраўнік Цэнтральнага камандаваньня ЗША, паведамляе «Голас Амэрыкі».
«Апошні самалёт C-17 вылецеў зь міжнароднага аэрапорту імя Хаміда Карзая 30 жніўня ў 15:29 паводле стандартнага ўсходняга часу», — заявіў генэрал Маккензі.
На борце самалёта знаходзіліся Крыс Донаг’ю — кіраўнік амэрыканскай вайсковай місіі ў Кабуле, і амбасадар ЗША ў Афганістане Рос Уілсан.
Прэзыдэнт ЗША Джо Байдэн падзякаваў амэрыканскім вайскоўцам за правядзеньне апэрацыі па эвакуацыі звыш 120 тысяч чалавек за 17 дзён.
У заяве міністар абароны ЗША Лойд Осьцін адзначыў, што сёньняшнія падзеі адзначылі заканчэньне «самай працяглай вайны ў гісторыі ЗША».
«Мы страцілі ў гэтай вайнe 2461 жаўнера. Тысячы іншых атрымалі раненьні — бачныя і нябачныя. Шнары, атрыманыя ў баях, ня гояцца лёгка і часта ня гояцца наогул», — сказаў Осьцін.
Па словах генэрала Маккензі, хоць вайсковая эвакуацыя завершана, дыпляматычная місія забесьпячэньня выезду грамадзян ЗША з Афганістану працягваецца.
«Агулам самалёты ЗША і кааліцыі эвакуавалі звыш 123 000 мірных жыхароў, і ўсё гэта стала магчымым дзякуючы вайскоўцам ЗША, якія ўтрымлівалі бясьпеку аэрапорту і кіравалі ім», — дадаў ён.
Маккензі адзначыў унёсак Нарвэгіі ў пасьпяховую эвакуацыю, бо прадстаўнікі гэтай краіны падтрымлівалі бесьперабойную працу шпіталя, што адыграла важную ролю ў дапамозе параненым, пацярпелым у выніку тэракту, зьдзейсьненага сьмяротнікам «Ісламскай дзяржавы».
Па словах генэрала, частку амэрыканскага вайсковага абсталяваньня, пакінутага ў Афганістане, дэмілітарызавалі і яго нельга будзе выкарыстоўваць у будучыні. У прыватнасьці размова ідзе пра тактычныя сыстэмы СПА (C-RAM), колавыя бронемашыны з узмоцненай супрацьміннай абаронай (MRAP), пазадарожнікі HMMWV, а таксама 73 самалёты.
