Адзначаецца, што надзвычайнае становішча было абвешчана ў сувязі з рэзкім ростам выпадкаў незаконнага перасячэньня мяжы Беларусі і Латвіі. Таксама была ўлічаная сытуацыя зь нелегальнымі пераходамі на беларуска-літоўскай мяжы.
«Пры неабходнасьці Кабінэт міністраў можа прыняць рашэньне запытаць міжнародную дапамогу праз Мэханізм цывільнай абароны ЭЗ, NATO, а таксама іншыя арганізацыі і плятформы міжнароднага супрацоўніцтва», — цытуе паведамленьне БелаПАН.
Як паведамлялася, урад Латвіі на пасяджэньні 10 жніўня абвясьціў рэжым надзвычайнай сытуацыі на мяжы зь Беларусьсю — у Люцынскім (Ludzas novads), Краслаўскім (Krāslavas novads), Верхнядзьвінскім (Augšdaugavas novads) паветах і ў горадзе Дзьвінску (Daugavpils).
Рэжым надзвычайнай сытуацыі будзе дзейнічаць да 10 лістапада. Памежнікам дазволена выкарыстоўваць фізычную сілу і спэцсродкі для неадкладнага вяртаньня асобаў, якія незаконна перайшлі мяжу з боку Беларусі.
На дапамогу памежнікам накіраваныя войска і паліцыя. Ім дазволена загадваць нелегалам адпраўляцца назад у Беларусь, кантраляваць выкананьне такіх загадаў, а таксама «рабіць неабходныя дзеяньні, каб мігранты вярталіся ў Беларусь».
Урад пастанавіў, што на тэрыторыі, дзе дзейнічае рэжым НС, структурныя падразьдзяленьні памежнай службы і іншыя ўстановы «не прымаюць заявы аб наданьні статусу ўцекача або альтэрнатыўнага статусу».
Разам з тым узброеным сілам належыць забясьпечыць месца і інфраструктуру для разьмяшчэньня нелегалаў і асобаў, якія прыбылі зь Беларусі і падалі заяву на атрыманьне статусу ўцекача.
Паток мігрантаў, якія імкнуцца перасекчы мяжу з Латвіяй зь Беларусі, павялічыўся пасьля таго, як Літва пачала адразу вяртаць нелегалаў на беларускую тэрыторыю, а не накіроўваць іх у лягеры ўцекачоў.
Урад Латвіі выдзеліў сродкі на стварэньне інфраструктуры для аховы мяжы зь Беларусьсю, у тым ліку на агароджу з калючага дроту, паведаміла 11 жніўня прэс-служба латвійскага Міністэрства ўнутраных спраў.
