Арышты і ператрусы 29 ліпеня: затрымалі блогерку Насту Пілюгіну і менскіх анархістаў

На вуліцы забралі блогерку

29 ліпеня раніцай у Менску затрымалі блогерку Насту Пілюгіну, маркеталягіню і мэдыя-мэнэджарку ў кампаніі Eleven, вядоўцу падкасту dzigital. Пра гэта Радыё Свабода паведаміў яе хлопец Уладзіслаў Піртань.

Гэта здарылася прыкладна аб 11-й гадзіне: Наста выйшла з дому да машыны, якая стаяла ў двары, па ноўтбук і зьнікла. Яе тэлефон быў выключаны, але потым уключыўся.

З дапамогай праграмы «лякатар» на айпадзе Насты Пілюгінай Уладзіслаў пабачыў, што яна недзе на завулку Казлова (на завулку Казлова, 6а знаходзіцца Ўпраўленьне КДБ у Менску). Званкі з тэлефона скідаліся.

Пазьней Уладзіслава паведаміў, што сілавікі прыйшлі зь ператрусам да іх дадому. Позна ўвечары ад сваякоў Уладзіслава Піртаня стала вядома, што яго і Насту Пілюгіну затрымалі.

ГЛЯДЗІЦЕ ТАКСАМА:

Арышты і ператрусы 28 ліпеня: трасуць Міронава-«хлопотное дельце» і кіраўніцу «Фонду разьвіцьця Берасьцейскай крэпасьці»

Адвезьлі на допыт менскіх анархістаў

У Менску сілавікі затрымалі актывістаў анархічнага руху Аляксандра Бялова і Яўгена Рубашку.

Абодва цяпер на допыце ў Сьледчым камітэце на падставе крымінальнай справы паводле арт. 342 КК (групавыя дзеяньні, якія груба парушаюць грамадзкі парадак).

Іх статус праваабаронцам пакуль невядомы.

ГЛЯДЗІЦЕ ТАКСАМА:

Арышты і ператрусы 27 ліпеня: ад 13 да 28 сутак за белыя аркушы на вокнах, пастаноўка «на ўлік» раней пакараных